काठमाडौं– दाङमा पीसीआर रिपोर्ट नआउँदै क्वारेन्टिनबाट घर पठाइएका १७ जनामा कोरोना संक्रमण पुष्टि भएपछि आक्रोशित स्थानीयले वडा कार्यालय घेराउ गरेका छन्।
घोराही उपमहानगरपालिका १७ का दुईवटा क्वारेन्टिनमा बसेकाहरुलाई घर फर्काइएपछि आएको रिपोर्टमा संक्रमण पुष्टि भएको हो।
चौघेरा क्वारेन्टिनमा बसेका १३ र प्रावि क्वाडीमा बसेका चार जनामा कोरोना संक्रमण भेटिएको छ। उनीहरुलाई पीसीआर रिपोर्ट नआउँदै जेठ २८ गते घर पठाइएको थियो।
उनीहरु गाउँमा गएर खसी काटेर खाएको, मदिरा सेवन गरेको र समुदाय मा रहनेमा कोरोना संक्रमणपुष्टि भएपछि गाउँलेहरु त्रसित बनेको वडा सदस्य तुलप्रसाद घिमिरेले बताए।
संक्रमण पुष्टि भएकाहरुको व्यवस्थापनको लागि वडालाई आइतबार नै जानकारी दिइएको हुँदा रातभर संक्रमित खोजेर आइसोलेसनमा पठाइएको घिमिरेले जानकारी दिए।
घोराही उपमहानगरपालिकाका मेयर नरुलाल चौधरीले लामो समय क्वारेन्टिनमा बसेकाहरुमा कुनै लक्षण नदेखिएपछि उनीहरुकै आग्रहमा घर पठाइएको बताए। स्वाब संंकलन गरिएको एक हप्तासम्म पनि रिपोर्ट नआउँदा समस्या भएको उनको भनाई छ।
स्वास्थ्य मन्त्रालयले जारी गरेको निर्देशिकामा १० दिनभन्दा बढी समय क्वारेन्टिनमा बसेका र कुनै पनि लक्षण नदेखिएकाहरूलाई पीसीआर चेकजाँच नै नगरी घर पठाउन सकिने उल्लेख छ।
रिपोर्ट पोजेटिभ आएकाहरू जेठ पहिलो साता भारतबाट आएका थिए। वडा सदस्य घिमिरे भने वडाध्यक्ष खुशीराम चौधरीले समन्वय बिना नै उनीहरूलाई घर पठाउँदा समस्या आएको बताउँछन्।