जनशक्ति अभावका कारण नेपाल सरकारले उपलब्ध गराएको पिसिआर मेसिन पूर्ण क्षमतामा चल्न नसकिरहेका बेला वीरगन्जमा दुई वटा मेसिन थपिने भएका छन्।
प्रदेश २ को मन्त्रिपरिषद् बैठकले सोमबार वीरगन्जलाई एउटा पिसिआर मेसिन उपलब्ध गराउने निर्णय गरेपछि यहाँ तीन वटा पिसिआर मेसिन हुने भएका हुन्।
यसअघि नै वीरगन्ज महानगरले पिसिआर मेसिन खरिद गर्न व्यवसायीबाट रकम संकलन गरिरहेको छ।
कोरोना परीक्षण गर्ने पिसिआर मेशिन खरिद प्रक्रियाका लागि वीरगन्ज महानगरपालिकाले आह्वान गरेको बोलपत्र मंगलबारसम्म पाँच थान बिक्री भएको छ ।
वीरगन्जमा कोरोना संक्रमतिहरुको संख्या बढ्दै गएपछि रोकथाम तथा नियन्त्रणको लागि बृहत परिक्षण गर्नुपर्ने आवश्यकतालाई मध्यनजर गर्दै मेशिन खरिदको लागि ५ दिने बोलपत्र प्रकाशन गरेको थियो ।
संघ तथा प्रदेश सरकारबाट मेशिन खरिदको लागि कुनै किसिमको आशा नदेखेपछि वीरगन्ज महानगरपालिकाले यहाँकै नागरिकहरुको सहयोगमा मेशिन खरिद गर्ने अठोट लिएर सहयोगको लागि आह्वान गरेको थियो ।
पिसीआर मेशिन तथा किट खरिदका लागि महानगर प्रमुख बिजय कुमार सरावगीले आम नगरवासी, पर्साका स्थानीय सरकार र पर्सावासीलाई आर्थिक सहयोगको लागि अपिल गरेका थिए ।
विभिन्न दाताहरुबाट सहयोग प्राप्त हुन थालेपछि महानगरपालिकाले गत शुक्रबार पिसिआर मेशिन खरिद सम्बन्धी पाँच दिने बोलपत्र प्रकाशन गरेको थियो । पिसीआर मेशिन तथा किट खरिदको मनसाय राखेर पाँचवटा कम्पनीले बोलपत्र खरिद गरेका छन् । सार्वजनिक खरिद ऐनले निर्दिष्ट गरे अनुसार पिसीआर मेशिन खरिद प्रक्रियाबाट अगाडि बढेको वीरगन्ज महानगरपालिकाले जनाएको छ ।
मंगलवार नै वीरगन्जका उद्योगी ब्यवसायीले पिसीआर मेशिन खरिदका लागि आर्थिक सहयोग समेत गरेका छन् ।
भएको मेसिनलाई पूर्ण क्षमताको चलाउन नसकेर महानगरले जथाभावी पैसा उठाइरहेको गुनासो स्थानीयको छ।