विहीबार, साउन २९, २०७७

समाचार

कोरोना संक्रमणको जोखिम फेरि बढ्यो, संक्रमित क्षेत्रमा सिल गर्ने तयारी

1594196519ktm_korona.jpg

काठमाडौं- कोरोना भाइरस संक्रमण दर बढ्दै गएपछि सरकारले संक्रमण देखिएको क्षेत्रमा उच्च सुरक्षा सतर्कता अपनाई पूर्ण सिल गर्ने तयारी गरेको छ।

काठमाडौंसहित देशका अन्य केही जिल्लामा कोरोना भाइरसका संक्रमित थपिएपछि निश्चित क्षेत्रलाई सिल गर्ने गृहकार्य सरकारले थालेको छ।

सरकारले काठमाडौं प्रवेशमा पनि कडाइ गरेको छ। गृह मन्त्रालयले केही दिनअघि विज्ञप्ति जारी गर्दै बेलुका ७ बजेदेखि बिहान ७ बजेसम्म प्रवेशमा रोक लगाउने निर्णय गरिसकेको छ।

अत्यावश्यक कामबाहेक अन्तरजिल्ला सवारी पास वितरण बन्द गरिएको छ।

कोभिड–१९ संकट व्यवस्थापन केन्द्र (सीसीएमसी) ले जोखिम बढ्न सक्ने आंकलन गर्दै उच्च सतर्कता अपनाउन आवश्यक भएको निष्कर्ष निकालेको छ।

कोभिड १९ संकट व्यवस्थापन कार्य सञ्चालन केन्द्रका संयोजक एवम् प्रधानमन्त्री कार्यालयका सचिव महेन्द्र गुरागाईंले संक्रमणको पछिल्लो अवस्थाबारे समीक्षा भइरहेको बताए।

‘नियन्त्रणमा गएन भने जोखिम बढ्न सक्ने आंकलन भएको छ। संक्रमण देखिएको स्थानबाट आउने मानिस रोक्न निर्देशन भइसकेको छ,’

गुरागाईंले नेपाल समयसँग भने, ‘लकडाउन नै गर्ने भन्ने विषयमा त अहिले नै छलफल भइसकेको छैन। अन्य विकल्पमा छलफल गरिएको छ।’

भारतबाट र संक्रमण देखिएका क्षेत्रबाट काठमाडौं आउने मानिसमा संक्रमण देखिएपछि त्यसले जोखिम बढाउन सक्ने देखिएको सीसीएमसीको निष्कर्ष छ।

‘भारतबाट आउनेलाई नाकामै क्वारेन्टाइनमा राखेर परीक्षण गर्ने र उपत्यका प्रवेश गर्नेलाई बाटोमै परीक्षण गर्ने काम भइरहेको छ,’ उनले भने, ‘संक्रमण बढेको ठाउँ विशेषलाई ध्यानमा राखेर लक गर्ने र स्वाब परीक्षणलाई बढाएर लैजाने बारेमा छलफल अघि बढेको छ।’

सरकारले संक्रमण बढी देखिएका ठाउँमा मात्र सिल गर्न लागेको हो।

‘जहाँ–जहाँ भेटिन्छ त्यहाँ सिल हुन्छ। अरु क्षेत्र सामान्य चल्छ। बाहिरबाट आउने क्रममा नियन्त्रण गर्ने गरी काम गर्न निर्देशन भइसकेको अवस्था छ,’ सीसीएमसी स्रोतले भन्यो।

भीडभाड बढ्नु, होटल, रेस्टुरेन्टमा बसेर खाना खानु र सुरक्षाका आवश्यक मादपण्ड पूरा नगरेका कारण पनि संक्रमण फैलन सक्ने देखिएको सरकारको निष्कर्ष छ।

वीरगन्जलगायतका केही स्थानमा कोरोना भाइरसको संक्रमण समुदाय स्तरमै फैलिएको भन्दै त्यहाँ पूर्ण रुपमा सिल गरिएको छ।

‘समुदायमा पुग्यो भने बालबालिका, वृद्धवृद्धालाई बढी जोखिम हुन सक्ने देखिन्छ,’ सीसीएमसी कार्य सञ्चालन केन्द्रका संयोजक गुरागाईंले भने, ‘सर्वसाधारणले पनि संक्रमणको जोखिमलाई ध्यानमा राखेर अनिवार्य मास्क, सेनिटाइजर प्रयोग गर्ने, अत्यावश्यक काम बाहेक बाहिर हिँडडुल नगर्ने र जानै परे भौतिक दुरी कायम गरेर हिँड्नुपर्छ।’

उनले स्थिति नियन्त्रण गर्ने पहिलो काम भएको भन्दै त्यो हुन नसकेर अवस्था भयावह भयो भने त लकडाउन गर्नैपर्ने अवस्था आउन सक्ने बताए।
गुरागाईंले अहिले स्थितिलाई थप जोखिमयुक्त हुन नदिने हिसाबले नै सुरक्षाका काम भइरहेको बताए।

सरकारले दैनिक १० हजार भन्दा बढी नमुना परीक्षण गर्न सुरु गरिसकेको छ। शुक्रबार मात्रै १० हजार ७ सय ६८ पीसीसआर परीक्षण गर्दा २ सय २४ जनामा संक्रमण देखिएको थियो। शनिबारसम्म काेराेना भाइरस संक्रमितकाे संख्या २० हजार नाघेकाे छ।

याे पनि पढ्नुस् ः

बागमतीमा कोरोना संक्रमितको संख्या १,११५ पुग्यो (कुन जिल्लामा कति?)

प्रतिक्रिया दिनुहोस्