काठमाडौं- आईसीसी क्रिकेट विश्वकप लिग–२ मा अमेरिकाविरुद्ध नेपालले जित निकालेको छ। ओमानको मस्कटस्थित अल अमारत क्रिकेट मैदानमा भएको खेलमा नेपालले अमेरिकालाई ५ विकेटले हराएको हो।
अमेरिकाले दिएको २३१ रनको लक्ष्य पछ्याएको नेपालले ५ विकेटको क्षतिमा ६ बल बाँकी हुँदै जित निकालेको हो।
नेपालका तर्फबाट ओपनर कुशल भुर्तेलले ८४ रन बनाएका थिए भने रोहित पौडेलले ६२ रन जोडेका थिए। यस्तै विनोद भण्डारीले ३७ रन संकलन गरेका थिए। नेपालका आसिफ शेखले २३ रन, कप्तान ज्ञानेन्द्रले २४ रन बनाए। ८४ रन जोड्न सफल भएका भुर्तेलले ३ चौका र ३ छक्का प्रहार गरेका थिए। रोहितले २ चौका र ३ छक्का प्रहार गरेका थिए।
टस जितेर पहिले ब्याटिङ गरेको अमेरिकाले निर्धारित ५० ओभरमा ९ विकेट गुमाएर २३० रन बनाएको थियो। अमेरिकाका मोनाक पटेलले शतक बनाएका थिए। उनले ९ चौका र एक छक्का प्रहार गरेका थिए।
त्रिदेशीय शृंखला अन्तर्गत नेपाले पहिलो खेल अमेरिकासँग खेलेको हो।