एमसीसीबारे निर्णय गर्न नेकपा सचिवालय बैठक, मन्त्री खतिवडा र ज्ञवाली तथा भीम रावल पनि सहभागी

सत्तारुढ दल नेकपाको सचिवालय बैठक प्रधानमन्त्रीको सरकारी निवास बालुवाटारमा जारी छ। बैठकको मुख्य एजेन्डा एमसिसी परियोजना रहेको बताइएको छ।

संसदमा दर्ता भएको र पारित नभइसकेको उक्त परियोजना आगामी आवको बजेटमा समावेश भएको भन्दै नेकपाभित्र असन्तुष्टि बढेको छ।

आजको सचिवालय बैठकमा अर्थमन्त्री युवराज खतिवडा, परराष्ट्रमन्त्री प्रदीप ज्ञवाली र स्थायी कमिटी सदस्य भीम रावल पनि सहभागी छन्।

एमसीसीबारे अध्ययन गर्न यसअघि नेकपाले सचिवालय सदस्य झलनाथ खनालको संयोजकत्वमा स्थायी कमिटी सदस्यहरू रावल र ज्ञवाली सम्मिलित कार्यदल पनि बनाएको थियो।

गत माघमा गठित उक्त कार्यदलले यथास्थितिमा एमसिसी पारित गर्न नहुने सुझाव दिएको थियो। सरकारले संसदको यो अधिवेशनमा एमसिसी पारित गर्ने तयारी गरेको छ।