जनकपुर र राजविराजका लागि प्रदेश सरकारद्वारा पीसीआर मेसिन खरिद

जनकपुरधाम- प्रदेश २ सरकारले स्वाब परीक्षण गर्न दुई थान पीसीआर मेसिन खरिद गरेको छ।

स्वाब परीक्षणको दायरा बढाउनुपर्ने खाँचो रहेका बेला जनकपुर र राजविराजमा जडान गर्न प्रदेश सरकारले पीसीआर मेसिन खरिद गरेको हो।

प्रदेश सरकारले खरिद गरेको पीसीआर मेसिन जनकपुरस्थित पशुरोग अन्वेषण प्रयोगशाला र सप्तरीको राजविराजस्थित गजेन्द्रनारायण सिंह सगरमाथा अस्पतालमा जडान हुनेछन्।

शुक्रबार बिहान काठमाडौंबाट आइपुगेको रियल टाइम पीसीआर मेसिन जडान कार्य सुरु भइसकेको सामाजिक विकास मन्त्रालयले जनाएको छ।

प्रति ४ घण्टामा ९६ जनाको स्वाब परीक्षण गर्ने क्षमता रहेको पीसीआर मेसिन सोमबारदेखि सञ्चालनमा आउने प्रादेशिक प्रयोगशालाका निमित्त प्रमुख रामविनय साहले जानकारी दिए।

यसअघि प्रादेशिक अस्पताल जनकपुरमा जडान भएका दुईवटा पीसीआर मेसिनले फरक नतिजा दिएपछि स्वाब परीक्षण बन्द भएको छ।

पहिलो पटक चैत महिनामा संघीय सरकारले पठाएको मेसिनबाट टेकु प्रयोगशालाभन्दा फरक नतिजा दिएपछि अर्को पीसीआर जडान गरिएको थियो।

तर, दोस्रो पटक जडान गरिएको पीसीआरले समेत भरपर्दो नतिजा दिन नसकेपछि जनकपुरमा स्वाब परीक्षण बन्द भएको छ। जनकपुर, वीरगंज र राजविराजसहित तीन स्थानमा रियल टाइम पीसीआर मेसिन जडान भइसकेपछि परीक्षणको दायरा बढ्ने विश्वास लिइएको छ।