काठमाडौं - वागमती प्रदेश जनस्वास्थ्य प्रयोगशालाका निर्देशक डा. नारायण कार्कीलाई दुर्व्यवहार गर्ने युवक धरौटीमा छुटेका छन्। नागढुंगामा डा. कार्कीलाई दुर्व्यवहार गरेको आरोपमा पक्राउ परेका चन्द्रागिरीका उत्तम कार्की १० हजार धरौटीमा छुटेका हुन्।
काठमाडौं प्रहरी परिसर टेकुका प्रमुख एसएसपी श्यामलाल ज्ञवालीले उनलाई धरौटीमा छाडिएको बताए। कोरोनाको कारण गम्भीर प्रकृतिको अपराध बाहेकमा मुद्दा नचलाउने भन्ने अदालत, सरकारी वकिल र प्रहरीको बीचमा सहमति अनुसार कार्कीलाई धरौटीमा छोडेको ज्ञावालीले जानकारी दिए। मुद्दा भने यथावत रहने उनले बताए।
जेठ ४ गते नियन्त्रणमा लिएपछि प्रहरीले कार्कीविरुद्ध अभद्र व्यवहार सम्बन्धी कसुरमा कारबाही प्रक्रिया अघि बढाउने जनाएको थियो। पछिल्लो समय कालीमाटी बृत्तको मुद्दा शाखामा कार्यरत प्रहरीलाई नै कोरोना भाइरस संक्रमण भेटिएपछि तिनवटै निकायमा त्रास फैलिएको छ।