झगडा मिलाएर फर्किंदै गरेका प्रहरी इन्चार्जकाे बाटैमा मृत्यु

ताप्लेजुङ- झगडा मिलाएर फर्कंदै गरेका ताप्लेजुङको सिरिजंगा गाउँपालिका वडा नं ७ खेवाङ प्रहरी चौकीका इन्चार्जको बाटोमै मृत्यु भएको छ।

अचानक बिरामी भएका प्रहरी सहायक निरीक्षक (असई) बालकुमार राईको बाटोमै मृत्यु भएको हो ।

सिदिङवा गाउँपालिका ७ सुरुमखिमको बुरुमखिममा झगडा मिलाएर राईसहितको टोली प्रहरी चौकी फर्किंदै थियो। तावाखोला नजिकै पुगेपछि अचानक बिरामी परेका राईको बाटैमा मृत्यु भएको प्रमुख जिल्ला अधिकारी डोरेन्द्र निरौलाले जानकारी दिए।

भोजपुरको लेखखर्क घर भई झापाको दमकमा बस्दै आएका ४२ वर्षीय राई महिना दिनअघि मात्र प्रहरी इन्चार्ज भएर खेवाङ पुगेका थिए।

सदरमुकाम फुङलिङबाट ताप्लेजुङका प्रहरी प्रमुख प्रहरी नायब उपरीक्षक महेन्द्रकुमार श्रेष्ठको नेतृत्वमा प्रहरी टोली घटनास्थलतर्फ गएको छ। घटनास्थल सदरमुकामदेखि ७/८ घण्टा लाग्छ।