जनकपुर उपमहानगरले बनायो ५० वेडको क्वारेन्टिन

जनकपुरधाम उपमहानगरपालिकाले ५० वेडको क्वारेन्टिन निर्माण गरेको छ । लकडाउन भएको ५० दिनभन्दा बढी समय बितिसकेपछि उपमहानगरले जनकपुरमा ५० वेडको क्वारेन्टिान सञ्चालनमा ल्याएको हो ।

उपमहानगरपालिका कार्यालयले जनकपुरधाम–४ राम चोकस्थित गोपाल धर्मशालाको भवनमा क्वारेन्टिान निर्माण गरेको छ । यसअघि जनकपुरधाम–७ जिरोमाइलस्थित स्वस्तीक अस्पतालमा बनाएको क्वारेन्टिन व्यवस्थित नरहेको भन्दै आलोचना भएपछि उपमहानगरले गोपाल धर्मशाला भवनलाई प्रयोग गरेको हो ।

गोपाल धर्मशालामा निर्माण गरिएको क्वारेन्टिन नेपाल सरकारले तोकेको मापदण्डअनुसार रहेको जनकपुरधाम उपमहानगरपालिकाकी उपमेयर रीता झाले दाबी गरिन् ।
धर्मशालाको २५ वटा कोठामा प्रत्येक कोठामा दुई दुईजना बस्ने गरी क्वारेन्टिन तयार पारिएको उनले जानकारी दिइन् ।

‘सरकारले तोकेको मापदण्डअनुसार क्वारेन्टिन तयार पारिएको छ, खानेपानीदेखि यहाँ बस्नेहरुका लागि टुथब्रससम्मको व्यवस्था गरिदिएका छौं,’ उनले भनिन्, ‘ढिलै भए पनि स्तरीय क्वारेन्टिन बनाउन पाउँदा खुशी लागेको छ ।’

उपमेयर मिश्रले तत्काल ५० बेडको क्वारेन्टिन सञ्चालन गरिए पनि यसलाई चाँडै सय बेडको बनाउने लक्ष्य राखिएको जानकारी दिइन् । ‘५० वटा वेड निजी अस्पतालहरुले सहयोग गरेको छ, थप ५० वटा तयार हुँदैछ,’ उनले भनिन्,‘अरु सबै थोक खरिद भइसकेको छ, बेड आएलगत्तै सय बेडको क्वारेन्टिन सञ्चालनमा आउने छ ।’

क्वारेन्टिन सञ्चालन गर्न छुट्टै बजेट नरहेकोले अन्य बजेटबाट रकमान्तर गर्नुुपर्ने उनले जानकारी दिइन् । क्वारेन्टिनमा बस्नेहरुको खाना र खाजा तयार पार्न छुट्टै भान्सेको व्यवस्था गरिएको उपमेयर मिश्रले बताइन्।