कोरोना पुष्टि भएका धनुषाका युवक काठमाडौंमा

जनकपुरधाम- धनुषाका एकजनामा सोमबार कोरोना पुष्टि भएको छ।

स्वास्थ्य तथा जनसंख्या मन्त्रालयले अपराह्न सार्वजनिक गरेको विवरणअनुसार धनुषाका २८ वर्षीय युवकमा कोरोना पुष्टि भएको हो।

कोरोना पुष्टि भएका ती युवक हाल काठमाडौं बस्दै आइरहेको बताइएको छ। धनुषाका प्रमुख जिल्ला अधिकारी कोषहरि निरौलाले संक्रमण देखिएका युवक धनुषामा नभई हाल काठमाडौं बस्दै आइरहेको बताए।

‘टेलिफोनमा उहाँसँग कुरा भएको छ, त्रिपुरेश्वरमा छु भन्नुभएको छ,’ प्रमुख जिल्ला अधिकारी निरौलाले भने, ‘स्वाब परीक्षण पनि उतैबाट भएको रहेछ।’

कोरोना संक्रमण देखिएका ती युवक पेशाले चालक रहेको बताएको प्रमुख जिल्ला अधिकारी निरौलाले जानकारी दिए।

‘कुनै सम्बन्धित कम्पनीमा चालक छु भन्नुभएको छ,’ उनले थपे, ‘कामको सिलसिलामा पूर्व–पश्चिम राजमार्गमा समेत ओहोरदोहोर गर्ने गरेको खुलेको छ।’