कोरोना भाइरस (कोभिड–१९) बाट मृत्यु भएकी सिन्धुपाल्चोककी २९ वर्षीया महिलाको शिशुलाई धुलिखेल अस्पतालको आइसोलेसनमा राखिएको छ। शिशुलाई जन्डिस देखिएको धुलिखेल अस्पतालका प्रवक्ता डा. सुमन ताम्राकारले जानकारी दिएका छन्।
उनका अनुसार सामान्य अवस्थामा पनि बच्चालाई जन्डिस देखिन्छ। तर, शिशु महिना नपुग्दै जन्मिएको र आमा कोरोना संक्रमित भएर मृत्यु भएकाले विशेषा निगरानी गरिएको छ। बालरोग विषेशज्ञको निगरानीमा शिशुलाई राखिएको उनले जानकारी दिए।
शनिबार मृत्यु भएकी महिलाले गत वैशाख २४ गते त्रिवि शिक्षण अस्पतालमा गर्भवती भएको सातौं महिनामा बच्चालाई जन्म दिएकी थिइन्। भोलिपल्ट अस्पतालले डिस्चार्ज गरेपछि एम्बुलेन्समार्फत उनलाई सिन्धुपाल्चोकको राम्चे पुर्याइएको थियो।
तर, जेठ १ गते ज्वरो आउने र श्वासप्रश्वासमा समस्या देखिएपछि स्थानीय स्वास्थ्य संस्थामा उपचार गरिएको थियो। उनको स्वास्थ्य अवस्था जटिल बनेपछि धुलिखेल अस्पताल ल्याइएको थियो।
मृतक महिलालाई कोरोना पुष्टि भइसकेपछि उनको उपचारमा संलग्न १० जना चिकित्सक एवं स्वास्थ्यकर्मीलाई क्वारेन्टिनमा राखिएको प्रवक्ता ताम्राकारले जानकारी दिए।
मृतकको हिजै पशुपति आर्यघाटको विद्युतीय शवदाह गृहमा अन्त्येष्टि गरिएको थियो ।