लकडाउन उल्लंघन गर्ने प्रदेश सांसदको गाडी नियन्त्रणमा

जनकपुरधाम - कोरोना संक्रमितको संख्या बढ्न थालेपछि प्रहरीले प्रदेश २ मा ‘लकडाउन’ लाई कडा बनाएको छ। ‘लकडाउन’ उल्लंघन गरी सवारी साधनहरु निर्वाधरुपमा हिँड्न थालेपछि पछिल्लो दुई दिनदेखि प्रहरीले कडाइ गरेको छ।

यसैबीच प्रहरीले बिनापास गाडी चलाएको भन्दै प्रदेश सांसद अशोक यादवको गाडी नियन्त्रणमा लिएको छ। प्रहरीले जनकपुरको भानुचोक नजिकबाट प्रदेश सांसद यादवको गाडी नियन्त्रणमा लिएको हो।

धनुषाका प्रमुख जिल्ला अधिकारी कोषहरि निरौलाले प्रहरीले चेकजाँच गर्दा पास देखाउन नसकेपछि गाडीलाई नियन्त्रणमा लिइएको जानकारी दिए। ‘लकडाउन उल्लंघन गरेर बिनापास सञ्चालन भएका सरकारी गाडीसमेत प्रहरीले नियन्त्रणमा लिएको छ। गाडीमा उहाँ हुनुहुन्थेन। प्रहरीले चालकलाई पास देखाउन भन्यो। पास नदेखाएपछि नियन्त्रणमा लिइएको हो।’, उनले भने। कोरोना संक्रमणको जोखिम बढ्दै जाँदा लकडाउनलाई प्रभावकारी बनाउन कडाइ गर्नुको विकल्प नरहेको निरौलाले बताए ।

‘लकडाउन’ उल्लंघन गरी सञ्चालन भइरहेका सरकारी गाडीसहित सयभन्दा बढी सवारी साधन प्रहरीले शुक्रबार जनकपुरबाट नियन्त्रणमा लिएको जिल्ला प्रहरी कार्यालय धनुषाका प्रवक्ता डीएसपी रामेश्वर कार्कीले बताए।

यसैगरी सरकारी तथा निजी गरी प्रदेश २ मा शुक्रबार साँझसम्म ‘लकडाउन’ उल्लंघन गरेर हिँड्ने १८२ सवारी साधन नियन्त्रणमा लिइएको प्रदेश प्रहरी कार्यालय जनकपुरले जनाएको छ।