राष्ट्रपति विद्यादेवी भण्डारीले निरोगी नेपाल निर्माण सरकारको मूल स्वास्थ्य नीति भएको बताएकी छन् ।
शुक्रबार संसदको संयुक्त बैठकमा सरकारको आगामी आर्थिक वर्षको नीति तथा कार्यक्रम प्रस्तुत गर्दै राष्ट्रपति भण्डारीले यस्तो बताएकी हुन् ।
नेपालीको रोग प्रतिरोधी क्षमता वृद्धि गर्न निरोधात्मक कार्यक्रम सञ्चालन गरिने तथा स्वास्थ्य सेवामा प्रतिरोधात्मक तथा उपचारात्मक विधि अपनाइने नीति तथा कार्यक्रममा उल्लेख छ ।
मुलुकभरका ६ सय ७१ स्थानीय तहका वडाहरुमा पूर्ण खोप सेवा उपलब्ध वडा घोषणम गरिएको उनले बताइन् । साथै आगामी वर्ष सरकारले बाँकी सबै स्थानीय तहका वडाहरुमा पूर्ण खोप सेवा पुर्याउने जनाइएको छ ।
आधारभूत स्वास्थ्य सेवा नभएका स्थानीय तहका थप २ हजार ६ सय २६ वडाहरुमा पूर्वाधार निर्माण र सेवाहरु उपलब्ध गराइएको राष्ट्रपति भण्डारीले बताइन् ।
आगामी वर्ष स्थानीय तहका वडामा रहेका स्वास्थ्य संस्थाको सेवाको गुणस्तर वृद्धि गरिने नीति तथा कार्यक्रममा उल्लेख छ। भूगोल र जनसंख्याको आधारमा हरेक स्थानीय तहमा ५ देखि १५ शैयासम्मको आधारभूत अस्पताल स्थापना र स्तरोन्नति गरिनेछ ।
प्रदेश स्तरमा रहेका साविकका जिल्ला अस्पताललाई २५ देखी ५० शैयाको अस्पताल र अञ्चल अस्पताललाई २ सय शैयाको जनरल अस्पतालमा स्तरोन्नती गरिने छ ।