जनकपुरधाम- धनुषामा ट्रकको ठक्करबाट एक महिलाको मृत्यु भएको छ उनका दुई सन्तान र भाइ घाइते भएका छन्।
पूर्व–पश्चिम राजमार्गअन्तर्गत मिथिला नगरपालिकाका–१० पुष्वलपुरमा ट्रकले ठक्करदिँदा मोटरसाइकलमा सवार जनकपुरधाम उपमहानगरपालिका–१९ जमुनिया बस्ने २५ वर्षीया चन्द्ररेखा यादवको मृत्यु भएको हो ।
मृतक चन्द्ररेखा पुष्वलपुर स्वास्थ्य चौकीमा स्टाफ नर्स थिइन् ।
ठक्करबाट गम्भीर घाइते भएकी उनको उपचारको क्रममा प्रादेशिक अस्पताल जनकपुरमा मृत्यु भएको प्रहरीले जनाएको छ ।
दुर्घटनामा मोटरसाइकल चालक चन्द्ररेखाका भाइ सिद्धार्थ यादव, दुई वर्षीय छोरा र ४ वर्षीया छोरी घाइते भएका छन्।
घाइतेहरुको प्रादेशिक अस्पताल जनकपुरमा उपचार भइरहेको ईलाका प्रहरी कार्यालय ढल्केबरले जनाएको छ ।
दिगम्बरपुरको बाटोहुँदै राजमार्गको पुष्वलपुर चोबाट पूर्वतर्फ जाने क्रममा बा ५२ प ८७४८ नम्बरको मोटरसाइकललाई कुखुराको दाना बोकेर इटहरीबाट जनकपुरतर्फ आइरहेको को १ ख २६२७ नम्बरको ट्रकले ठकरदिँदा दुर्घटना भएको प्रहरीले जनाएको छ ।
ठकर दिने ट्रक र चालकलाई प्रहरीले नियन्त्रणमा लिएको छ ।