सञ्चारकर्मीलाई स्वास्थ्य मन्त्रालय प्रवेश गर्न कठिन

अन्य समयमा कार्यालयको परिचयपत्र देखाएर सहजै समाचार संकलनका लागि प्रवेश गर्न पाउने सञ्चारकर्मीलाई अब भने स्वास्थ्य तथा जनसंख्या मन्त्रालमा प्रवेश गर्न कठिन हुने भएको छ। आज (बुधबार) देखि मन्त्रालयले सञ्चारकर्मीको प्रवेशमा कडाइ गरेको हो।

अबदेखि मन्त्रालयमा कसलाई भेट्न जाने हो, उसले बोलाएमात्रै प्रवेश पाइनेछ। मन्त्रालयको मूल गेटमै सुरक्षाकर्मीले रोकेर सोधपुछ गरी भित्रबाट अनुमति आएमात्र प्रवेश दिन थालेका छन्।

कर्मचारीहरुले पनि मन्त्रालयका प्रवक्ता, मन्त्रीका विज्ञ सल्लाहकार तथा निजी सचिवालयलाई सूचना नदिई सञ्चारकर्मीलाई भेट्न नपाउने भएका छन्।

कोरोना भाइरस संक्रमणको जोखिमका कारण यस्तो व्यवस्था गरिएको मन्त्रालयले बताएको छ।

स्वास्थ्य मन्त्रालय सिंहदरबारभन्दा बाहिरै भएकाले सञ्चारकर्मीले सूचना विभागको परिचयपत्र बिना पनि सहजै प्रवेश पाउने गरेका थिए।