कैलाली - कालापानी क्षेत्रका लागि काठमाडौंबाट हिँडेको सशस्त्र प्रहरीको टोली दार्चुला पुगेको छ। लिपुलेक सुरक्षा छाङरुमा बिओपी राख्ने टोली आज काठमाडौंबाट त्यसतर्फ प्रस्थान गरेको थियो। नेपाली सेनाको हेलिकप्टरमार्फत काठमाडौंबाट हिँडेको टोली बिहान ११ बजे दार्चुला सदरमुकाममा रहेको दुर्गादल गुल्ममा अवतरण गरेको थियो।
दार्चुलाको व्यास गाउँपालिका-१ स्थित छाङरुमा सीमा निगरानी चौकी (बिओपी) स्थापनाका लागि टोली दार्चुला आइपुगेको हो।
भारतले एकतर्फी सडक बनाएर उद्घाटन गरेपछि त्यस क्षेत्रको सीमा सुरक्षाका लागि बिओपी स्थापना गरिने छ। केही दिनअघि भारतको पिथौरागढबाट नेपालको कालापानीस्थित गुञ्जी हुँदै चीनको मानसरोवर जाने लिपुभञ्याङसम्मको सडक निर्माण गरी भारतले उद्घाटन गरेको थियो।
सीमा निगरानी चौकीमा २५ जना सशस्त्र प्रहरी खटाइने छ। सशस्त्र प्रहरी बल नेपाल ५० नं गुल्मका प्रमुख सशस्त्र प्रहरी नायब उपरीक्षक डम्बरबहादुर विष्टका अनुसार प्रहरी निरीक्षक मिलीबहादुर चन्दको नेतृत्वमा २५ जनाको टोली दार्चुला पुगेको छ। सरकारले गत मङ्सिरमा नै यहाँ बिओपी राख्ने निर्णय गरेको भएपनि अहिलेसम्म स्थापना हुनसकेको छैन।