धनुषाकी कोरोना संक्रमित लकडाउनभन्दा १० दिनअघि दिल्लीबाट आएकी थिइन्

जनकपुरधाम- धनुषामा कोरोना पुष्टि भएकी युवती दुई महिनाअघि भारतबाट आएको बुझिएको छ।

मिथिला नगरपालिका लालगढकी–१० माझी टोली बस्ने २० वर्षीया युवती धनुषामा रहेका ससुरा वितेपछि लकडाउन सुरु हुनुभन्दा १० दिनअघि नै श्रीमान र छोरासँगै दिल्लीबाट गाउँ फर्केकी हुन्।

होम क्वारेन्टिनमा रहेको भनिए पनि उनी एउटा भोजमा सहभागी भएको र अन्य व्यक्तिको सम्पर्कमा पुगेको बुझिएको छ।

त्यसैले उनी दिल्लीबाटै संक्रमित भएर आएकी हुन् वा उनलाई यहीं सक्रमण भएको हो एकिन हुन सकेको छैन।

‘ती महिलासहित विदेशबाट आएका सबैको तथ्यांक संकलन गरेर आरडीटी गर्न लगाएका थियौं, सबैको रिपोर्ट निगेटिभ देखियो,’ लालगढ स्वास्थ्य चौकीका इञ्चार्ज अशोक भण्डारीले भने,‘वैशाख २५ गते सबैको पीसीआर टेस्ट गर्न लगाएपछि उनमा पोजिटिभ देखिएको छ ।’

कोरोना संक्रमण पुष्टि भएकी उनलाई अहिले लालगढस्थित क्वारेन्टाइनको आइसोलेसनमा भर्ना गरिएको छ।