इलाका प्रहरी कार्यालय बुटवलका डीएसपी भिमलाल भट्टराई कारबाहीमा परेका छन्। ड्युटीकै समयमा मादक पदार्थ सेवन गरिरहेको भेटिएपछि प्रदेश प्रहरी कार्यालय दाङले उनलाई कारबाही गरेको हो।
५ नम्बर प्रदेश प्रहरी कार्यालय दाङका प्रवक्ता राजकुमार बैदवारले भने, 'उहाँलाई केही कुरा बुझ्नुपर्ने भएकोले झिकाइएको छ।' उनलाई कारबाही गरिएको बारे भने बैदवारले स्पष्ट बताएनन्।
प्रदेश प्रहरी स्रोतका अनुसार मातहतको निर्देशन नमानेको र मादक पदार्थ सेवन गरी ड्युटीमा खटिएको भेटाएपछि भट्टराईलाई कारबाहीस्वरुप प्रदेश प्रहरी कार्यालयमा तानिएको हो।
प्रदेश तथा जिल्ला प्रहरी कार्यालयले कार्यशैली सच्याउन पटक–पटक निर्देशन दिए पनि नसुधारेपछि बुधबार उनलाई कारबाहीका तानिएको हो। उनीविरुद्ध दैनिक थुप्रै मौखिक उजुरी परेको प्रहरी स्रोत बताउँछ।
लकडाउनको समयमा प्रहरी संरक्षणमा नै बुटवल क्षेत्रमा जुवा खेलाउने गरेको, कालाबजारी तथा तस्करसँग हिमचिम बढाएको र मातहतलाई समेत कमाण्ड कन्ट्रोल गर्न अक्षम देखिएको आरोप उनलाई लागेको छ।