मंगलबार राति कोरोना भाइरसको संक्रमण पुष्टि भएका भक्तपुरका दुई जना र काठमाडौंका एक जनालाई टेकु अस्पतालमा भर्ना गरिएको छ। तीनै जनालाई राति ३ बजे टेकु अस्पताल ल्याइएको हो।
उनीहरुमध्ये एक जना चन्द्रागिरीकी महिला भएको खुलेको छ। उनी नेपालगञ्जबाट आएको बताइएको छ। टेकु अस्पतालका अनुसार उनी लकडाउनअघि कुनै कार्यक्रमको लागि महेन्द्रनगर पुगेकी र लकडाउनले कार्यक्रम हुन नसकेपछि वैशाख २९ गते काठमाडौं फर्किएकी थिइन्।
भक्तपुरकी २५ वर्षिया युवती पनि सुनसरीबाट वैशाख २९ गते नै भक्तपुर फर्किएकी थिइन्। भक्तपुरको सल्लाघारीमा डेरा गरेर बस्ने ती युवती सर्लाहीबाट पास मिलाएर बाइकमा काठमाडौं फर्किएकी खुलेको छ। उनी पनि लकडाउन अगावै सुनसरी पुगेकी थिइन् ।
यस्तै भक्तपुरकै अर्का संक्रमित २७ वर्षीय पुरुष दुवाकोटका रहेको खुलेको छ। उनले आफू काठमाडौं बाहिरबाट नआएको बताएका छन्।