काठमाडौं- लकडाउनलाई खुकुलो पार्न आज (आइतबार) बाट काठमाडौं उपत्याकामा नयाँ नियम लगाइएको छ ।
लकडाउनको ४८ औं दिन आजबाट बैङ्क तथा वित्तीय संस्थाहरू खुल्ने भएका छन् । सरकारले अन्य साना तथा ठूला पसलहरू पनि खुल्न दिने भएको छ । सर्तसहित केहि संघसंस्था र उद्योग धन्दापनि आजबाट खुल्ने भएका छन् ।
यस्तै सरकारले लकडाउन खुकुलो बनाउँदै यसको मोडालिटी परिवर्तन गरेपछि शनिबार उपत्यकाभित्र सवारी सञ्चालन गर्नका लागि महानगरीय ट्राफिक प्रहरी महाशाखाले नयाँ व्यवस्था लागू गरेको छ।
अबबाट मालबहाक सवारीले राति ८ बजेदेखि बिहान ६ बजेसम्म मात्र काठमाडौं उपत्यकामा प्रवेश पाउने छन्। आज बिहान ६ बजेदेखि उपत्यकाभित्र छिर्ने सबै निर्माण सामाग्री बोकेका सवारीलाई रोक लगाइएको छ।
त्यस्तै, सरकारी कार्यालयका सवारीलाई बिहान ९ बजेदेखि साढे १० बजेसम्म कर्मचारी कार्यालय ल्याउन र दिउँसो ५ बजेदेखि ६ बजेसम्म फर्किन समय निर्धारण गरिएको छ।
त्यस्तै बैङ्क तथा वित्तीय संस्थाको लागि भने बिहान साढे ९ बजेदेखि साढे १० बजेसम्म कर्मचारी ल्याउन र फर्किन भने दिउँसो ३ बजेदेखि ५ बजेसम्म सवारी चलाउन समय दिइएको छ ।
त्यस्तै, अत्यावश्यक खाद्यान्न ढुवानीका सवारी साधनले भने बिहान १० बजेसम्म ढुवानी गरिसक्नु पर्ने व्यवस्था गरिएको छ।
सरकारी कार्यालयका कर्मचारी, बैङ्क वित्तीय संस्था लगायत आजबाट खुला हुने उद्योग धन्दा र संघसंस्थाका कर्मचारीले आफ्नो सवारी साधनमा तोकेको समयभित्र मात्रै कार्यालय जाने र आउने गर्न पाउने छन् । तोकिएको समयमा हिडडुल गर्ने कसैलाई नरोकिने प्रहरीले जनाएको छ ।
स्वास्थ्यकर्मी चढेको सवारी, एम्बुलेन्स, दकमल, प्रेसलगायत अत्यावाश्यक सवारी साधनमा भने यो नियम लागु हुने छैन् ।
वैशाख २४ गते बसेको मन्त्रिपरिषद्को बैठकले लकडाउनको मोडालिटी परिवर्तन लकडाउन खुकुलो बनाउने निर्णय गरेको थियो । जुन आजबाट कार्यान्व्यनमा आएको हो ।