काठमाडौं– भारतले नेपाली भूमि लिपुलेक हुँदै चीनको मानसरोवर जोड्ने सडक निर्माण गरेकोबारे प्रमुख प्रतिपक्षी दल नेपाली कांग्रेसले सरकारको धारणा मागेको छ।
कांग्रेसले लिपुलेक नेपालको भूमि भएको बताउँदै यसमा भारतले बनाएर उद्घाटन गरिसकेको सडकको बारेमा सरकारले आफ्नो धारणा राख्नुपर्ने बताएको हो।
कांग्रेस प्रवक्ता विश्वप्रकाश शर्माले भने, “लिपुलेक नेपालको भूमि हो, हामी यसमा प्रष्ट छौं, भारतले लिपुलेक हुँदै चीन जोड्ने सडक बनाएकोबारे सरकारको धारणा चाहन्छौं।”
नेपाली भूमिबारे उच्चस्तरीय कूटनीतिक पहलमार्फत दीर्घकालीन समाधान खोज्ने दायित्व पनि सरकारको भएको कांग्रेसले जनाएको छ।
भारतले लिपुलेक हुँदै चीनको मानसरोबर जोड्ने सडक शुक्रबार मात्रै उद्घाटन गरेको छ।