खाडी मुलुकबाट पाँच लाख ३४ हजार श्रमिक तत्काल फर्किने तयारीमा

काठमाडौं– रोजगारीका लागि खाडी मुलुकमा रहेकामध्ये पाँच लाख ३४ हजार श्रमिक स्वदेश फर्किने तयारीमा छन्।

वैदेशिक रोजगार बोर्डको सचिवालयद्वारा तयार प्रतिवेदनअनुसार कोभिड–१९ को संक्रमण र लकडाउनले रोजगारी, काम गर्ने समय र तलब कटौती भएपछि उनीहरू फर्किन खोजेका हुन्।

यसमध्ये बहराइन, यूएई, साउदी अरेबिया, कतार, ओमान र मलेसियाबाट एक लाख २७ हजार श्रमिकलाई तत्काल उद्धार गर्नुपर्ने अवस्था छ।

बोर्डका कार्यकारी निर्देशक राजनप्रसाद श्रेष्ठले बुधबार संसद्को अन्तर्राष्ट्रिय सम्बन्ध समितिमा दिएको जानकारीअनुसार मलेसियामा नेपाली श्रमिकको संख्या तीन लाख २५ हजार छ।

भिसाको म्याद सकिएको र आममाफीका कारण तत्काल फर्किनुपर्नेमा सात हजार जना छन्। त्यसैगरी ३० हजार जना रोजगारी गुमाएर फर्कन लागेका छन्।

यस्तै, कतारमा तीन लाख ५२ हजार श्रमिक छन् । जसमा भिसाको म्याद सकिएको, आममाफी र रोजगार गुमाएका एक लाख ७५ हजार जना छन्।

साउदी अरेबियाबाट २० हजार, यूएईबाट १२ हजार र कुबेतबाट ९ हजार श्रमिकलाई तत्काल उद्धार गर्नुपर्ने छ।