काठमाडौं- लकडाउन खुकुलो पार्ने विषयमा सरकारले छलफल थालेको छ ।
प्रधानमन्त्री निवास वालुवाटारमा जारी बैठकमा लकडाउन खुकुलो पार्ने र खोल्ने विषयमा छलफल भइराखेको पर्यटन मन्त्री योगेश भट्टराईले जानकारी दिए ।
यस्तै संसदको आगामी बजेट अधिवेशनका विषयमा पनि बैठकमा छलफल भइराखेको उनले बताए ।
वैशाख २६ गतेबाट रेड, एलो र ग्रिन जोन बनाएर लकडाउन खुकुलो बनाउने सरकारको रणनीति छ । सिंगो देशलाई तीन क्षेत्रमा विभाजन गरी सोहीअनुसार लकडाउनलाई खुकुलो बनाउने गरि कार्य योजना तयार पारिएको एक मन्त्रीले जानकारी दिए ।
ग्रिन जोनमा पर्ने जिल्ला तथा क्षेत्रमा लकडाउन हटाएर सबै क्रियाकलाप खुला गरिने छ । संक्रमण नियन्त्रण उन्मुख रहेका जिल्ला तथा क्षेत्रलाई एल्लो जोनमा राखिनेछ भने सो क्षेत्रमा मुख्य क्रियाकलाप मात्रै खुला राखिनेछ ।
संक्रमण नियन्त्रण बाहिर रहेको क्षेत्रमा भने लकडाउन जारी राखिनेछ र कृषिबाहेक अन्य सबै क्रियाकलाप बन्द गरिनेछ ।
लामो समयसम्म लकडाउन जारी राखिने रेड क्षेत्रमा अत्यावश्यक खाद्यान्न आपूर्ति गर्ने तथा राहत आवश्यक पर्ने परिवारका लागि राहत दिने व्यवस्था सरकारले मिलाउने गरी सरकारले कार्ययोजना बनाइएको छ ।