काठमाडौं- प्रमुख प्रतिपक्षी दल नेपाली कांग्रेस, जनता समाजवादी पार्टी (जसपा) र राष्ट्रिय प्रजातन्त्र पार्टी (राप्रपा) ले सरकारविरुद्ध संयुक्त संघर्ष गर्ने भएका छन्।
तीन दलबीच कांग्रेस केन्द्रीय कार्यालय सानेपामा साेमबार भएको छलफलले संयुक्त रुपमा संघर्ष गर्ने निर्णय गरेकाे हाे।
बैठकपछि तीनै दलले संयुक्त रुपमा जारी गरेको विज्ञप्तिमा सरकार लोकतान्त्रिक मूल्यमान्यतालाई कुल्चिँदै स्वेच्छाचारी भएकाले संयुक्त संघर्ष गर्ने प्रतिबद्धता जनाइएको छ।
तीन दलले जसपा सांसद डा.सुरेन्द्र यादवको अपहरण प्रकरणमा संलग्नलाई कारबाहीकाे माग गरेका छन्। यस्तै बैठकले लकडाउन अवधिमा जनताको आवश्यकता पूर्ति गर्न र कोरोना परीक्षण प्रक्रिया तीव्र बनाउन माग गरेकाे छ।
छलफलमा नेपाली कांग्रेसका सभापति शेरबहादुर देउवा, वरिष्ठ नेता रामचन्द्र पौडेल, उपसभापति विमलेन्द्र निधि र विजय गच्छदारलगायत नेता सहभागी थिए।
यसैगरी जसपाबाट महन्थ ठाकुर, डा.बाबुराम भट्टराई, उपेन्द्र यादव र राजेन्द्र महतो तथा राप्रपाबाट प्रकाशचन्द्र लोहनी सहभागी थिए।
यस्ताे छ निर्णय
१. लोकतान्त्रिक मूल्य र मान्यताहरुलाई कुल्चिँदै यो सरकार सर्वसत्तावादतर्फ अग्रसर भएको स्पष्ट छ। हामी यो प्रवृत्तिको घोर भर्त्सना गर्दछौं र यस किसिमको स्वेच्छारी र सर्वसत्तावादी प्रवृत्तिविरुद्ध सम्पूर्ण लोकतन्त्रवादी शक्ति एकताबद्ध भई संघर्ष गर्ने प्रतिबद्धता व्यक्त गर्दछौं।
२. सरकारले लोकतान्त्रिक मूल्य र मान्यतालाई तहसनहस गरी अधिनायकवादी उद्देश्य प्राप्तिका लागि सरकारको समेत संलग्नतामा सांसद डा. सुरेन्द्र यादव अपहरण काण्डले नेपाली जनता आक्रोशित भएका छन्। यस्ता आपराधिक कार्यको यो बैठक घोर भत्र्सना गर्दछ र अपराधमा संलग्न व्यक्तिहरुलाई तत्काल कानुनी कारबाही अगाडि बढाउन माग गर्दछ।
३. कोरोना भाइरसको संक्रमणको सन्दर्भमा गरिएको लकडाउन अवधिमा जनताका न्यूनतम आवश्यकता पूर्ति गर्ने तथा नेपाली अर्थतन्त्रमा परेको नकारात्मक प्रभावलाई न्यून गर्न आवश्यक राहत र कुनै ठोस कार्ययोजना सरकारले दिन सकेको छैन। यस अवस्थामा तत्काल राहत र कार्यक्रमको ठोस योजना प्रस्तुत गर्न माग गर्दछ। साथै, कोरोना भाइरसको यथार्थ स्थिति पत्ता लगाउन आवश्यक टेस्टिङमा भएको असाधारण ढिलासुस्ती समाप्त गरी तीव्रता दिन यो बैठक माग गर्दछ।