पर्साको वीरगञ्ज महानगरपालिकाकी एक युवतीको उपचारका लागि अस्पताल दौडाउँदा–दौडाउँदै मृत्यु भएको छ।
ब्लड क्यान्सरबाट पीडित २३ वर्षीया ती युवतीको गत चैत ४ गतेसम्म चितवनको भरतपुरस्थित विपी कोइराला क्यान्सर अस्पतालमा उपचारर भइरहेको थियो।
एक महिनाको बसाइपछि अस्पतालले उनलाई केही औषधि दिएर घर पठाएको थियो। हिजो शनिबार गाह्रो भएपछि उनलाई फेरि भरतपुर लगियो । तर, बेड नभएको भन्दै कुनै अस्पतालले पनि भर्ना लिन मानेनन्।
त्यसपछि युवतीलाई फर्काएर वीरगञ्ज नै लगियो। वीरगञ्जका नेशनल मेडिकल कलेज र एडभान्स हस्पिटलले पनि आईसियू बेड खाली नभएको भन्दै फिर्ता पठाइदिए।
युवतीलाई त्यसपछि वीरगञ्जकै तराई अस्पताल पुर्याइयो। त्यहाँ उनको द्रूत परीक्षण विधि (आरडीटी) बाट कोरोना परीक्षण गरियो। एन्टीबडी पोजेटिभ देखिएपछि लगत्तै अर्को परीक्षण गर्दा पनि पोजेटिभ नै देखियो।
नारायणी उपक्षेत्रीय अस्पतालका मेडिकल सुपरिडेन्डेन्ट मदनकुमार उपाध्यायले बताएअनुसार त्यसपछि नारायणी अस्पतालबाट गएको स्वास्थ्यकर्मीको टोलीले तेस्रोपटक आरडीटी गर्यो। त्यसमा पनि पोजेटिभ आएपछि युवतीलाई नारायणी अस्पताल लैजाँदै गर्दा बाटोमै मृत्यु भएको अस्पतालका मेसु उपाध्यायले बताए।
उनले भने, ‘उनको अवस्था क्यान्सरकै कारण गम्भीर थियो, तर पनि हामीले कोरोनाको पुष्टि गर्न स्वाब परीक्षणका लागि हेटौंडा प्रयोगशाला पठाएका छौं।’
युवतीको शव अहिले नारायणी अस्पतालको आइसोलेसनमै राखिएको मेसु उपाध्यायले जानकारी दिए ।