बालकमा कोरोना देखिएपछि स्वास्थ्यकर्मीको स्वाब परीक्षण गरिँदै

जनकपुरधाम - प्रादेशिक अस्पताल जनकपुरका चिकित्सक तथा स्वास्थ्यकर्मीहरुको पनि स्वाब परीक्षण हुने भएको छ। सर्लाहीका एकजना बालक कोरोना संक्रमित पाइएपछि प्रादेशिक अस्पताल जनकपुरका चिकित्सक र स्वास्थ्यकर्मीहरुको स्वाब परीक्षण गर्न लागिएको हो।

कोरोना संक्रमित देखिएका सर्लाही धनकौला गाउँपालिकाको हरकटवाका बालक दुई दिन प्रादेशिक अस्पतालस्थित आइसोलेसनमा बसेकोले चिकित्सक र स्वास्थ्यकर्मीहरुको स्वाब परीक्षण गर्न लागिएको कोरोना उपचार समितिका प्रमुख डा.कुलदीप पण्डितले जानकारी दिए।

प्रादेशिक अस्पताल जनकपुरको आइसोलेसन वार्डमा ती बालकको उपचारमा प्रत्यक्ष वा अप्रत्यक्ष रुपमा संलग्न चिकित्सक र स्वास्थ्यकर्मीहरुको स्वाब परीक्षण गर्न लागिएको डा.पण्डितले बताए। ‘टेकुस्थित प्रयोगशालाले बालक कोरोना संक्रमित रहेको पुष्टि गरेपछि उनको सम्पर्कमा आएकाहरुको ट्रेसिङ सुरु गरेका छौं’, उनले भने, ‘चिकित्सक र स्वास्थ्यकर्मीहरुको स्वाब संकलन भइरहेको छ, हिजोपनि नमूना संकलन गरेका छौं, आजपनि भइरहेको छ।’

स्वाब परीक्षणको नतिजाको आधारमा चिकित्सक र स्वास्थ्यकर्मीहरुलाई क्वारेन्टाइनमा समेत राख्न सकिने उनले जानकारी दिए। ‘अहिले कन्ट्याक्ट ट्रेसिङमा हामी जुटेका छौं, प्रादेशिक अस्पतालबाट डिस्चार्ज भइसकेपछि ती बालक गाउँमा कहाँकहाँ पुगे हामी बुझ्दै छौं’, पण्डितले थपे, ‘पत्ता लागि सकेकाहरुको स्वाब नमुना संकलन पनि भएको छ, नतिजा आइसकेपछि क्वारेन्टाइनमा राख्ने काम सुरु हुन्छ।’