जनकपुरधाम- ‘लकडाउन’ का कारण जनकपुरमा मनाइने जानकी नवमी प्रभावित हुने भएको छ।
जानकी मन्दिरका उत्तराधिकारी महन्त रामरोशन दासले बुधबार पत्रकार सम्मेलन गरेर जानकी नवमीमा यस वर्ष कुनै उत्सव आयोजना नगरिने जानकारी दिएका छन् ।
‘अहिलेको पहिलो प्राथमिकता कोरोनाविरुद्धको लडाइँ हो। हामी सबै एकजुट भएर कोरोनाविरुद्ध लड्नुपर्नेछ,’ उनले भने, ‘कोरोना संक्रमण फैलिन नदिन लागू गरिएको लकडाउन पालना गर्नुपर्ने भएकोले हामी यस वर्ष जानकी नवमीमा कुनै उत्सव नगर्ने निष्कर्षमा पुगेका छौं।’
उत्सव तथा मेला आयोजना नगरिए पनि उनले वैशाख २० गते मनाइने जानकी जन्मोत्सवका अवसरमा ९ दिनसम्म मन्दिरभित्रै पूजाअर्चना गरिने जानकारी दिए।
उत्तराधिकारी महन्त दासले विश्वभर फैलिएको कोरोना महामारीका कारण जारी लकडाउनको पालना गर्दै घरभित्रै विशेष आरती र दीपोत्सवका साथ जानकी जन्मोत्सव मनाउन आग्रह गरेका छन्।