काठमाडौं- विदेशबाट आएका काभ्रेका दुई जनामा कोरोना भाइरस संक्रमणको आशंका गरिएको छ।
र्यापिड टेस्ट गर्दा नतिजा पोजेटिभ आएपछि उनीहरुलाई थप परीक्षणका लागि धुलिखेल अस्पतालमा लगिएको जिल्ला स्वास्थ्य कार्यालयले जनाएको छ।
संक्रमणको आशंका गरिएकामा एकजना युवक बेथानचोक गाउँपालिकाका छन्। उनी चैत ८ गते भारतबाट आएका थिए। उनीसँगै आएका अन्य दुईजनाको भने रिपोर्ट नेगेटिभ पाइएको छ।
यस्तै मण्डनदेउपरका अर्का युवकको पनि टेस्ट गर्दा पोजेटिभ जस्तो देखिएपछि थप परीक्षण गर्न धुलिखेल अस्पताल लगिएको छ। दुबईबाट आएका उनी केही दिन नगरपालिकाको क्वारेन्टाइनमा बसेका थिए। शंका लागेपछि उनलाइ धुलिखेल पठाइएकाे नगर प्रमुख टाेकबहादुर तामाङले जानकारी दिए।
दुवैको स्वाब परीक्षण गरेपछि मात्र संक्रमण भए नभएको पुष्टि हुने धुलिखेल अस्पतालले जनाएको छ। उनीहरूकाे स्वाब परीक्षणका लागि बुधबार टेकुस्थित प्रयाेगशलामा पठाइने अस्पताल स्राेतले बतायाे।