एमसीसीको विरोधमा पक्राउ परेका ५४ जना चार दिन प्रहरी हिरासतमै रहने

काठमाडौं– नेपाल भ्रमणमा रहेकी एमसीसी उपाध्यक्ष फातिमा जेड सुमार र सहअध्यक्ष जोनाथन ब्रुससहितको टोलीको सुरक्षा व्यवस्थामा अवरोध गर्ने ५४ जनालाई प्रहरीले पक्राउ गरेको छ। 

काठमाडौंका विभिन्‍न क्षेत्रबाट बिहीबार साँझसम्म ५४ जनालाई पक्राउ गरिएको महानगरीय प्रहरी परिसरले जनाएको छ। अमेरिकी अनुदान सहायता मिलेनियम च्यालेन्ज कम्प्याक्ट (एमसीसी) को विरोध गर्दै आएका विभिन्‍न समूहले बिहीबार एमसीसी उपाध्यक्षलाई कालो झण्डा देखाउने तथा भौतिक आक्रमणको प्रयास गरेका थिए। 

यस्ता गतिविधिमा संलग्‍न व्यक्तिहरुलाई पक्राउ गरी प्रहरी हिरासतमा राखिएको छ। उनीहरुलाई फातिमाको कार्यक्रम सकिएपछि मात्र छोडिने एक उच्च‍ प्रहरी अधिकारीले जानकारी दिएका छन्। 

उनले भने, ‘आज नै छोड्ने हो भने फेरि पनि अराजक गतिविधिहरु हुन सक्‍ने भएकोले कार्यक्रम सकिएपछि छोड्‍ने तयारी छ। यसका लागि जिल्लाको सुरक्षा समितिको बैठक गरेर अन्तिम टुंगो लगाइने छ।’ 

फातिमाको टोली चार दिने भ्रमणका लागि बिहीबार बिहान काठमाडौं ओर्लिएको छ। बिहीबार टोलीले प्रमुख प्रतिपक्षी दलका नेता केपी शर्मा ओलीलाई उनकै निवास बालकोट पुगेर भेटेको छ।