छुट्टाछुट्टै घटनामा ५ जनाको मृत्यु

काठमाडौं– देशका विभिन्न ठाउँमा भएका छुट्टाछुट्टै घटनामा परी ५ जनाले ज्यान गुमाएका छन्।

सवारी दुर्घटना, भीरबाट लडेर तथा चट्याङ लागेर ५ जनाको ज्यान गएको प्रहरीले जनाएको छ। यस्तै २ जनाको शव बेवारिसे अवस्थामा भेटिएको छ।

धनुषाको मिथिला नगरपालिका–६ का प्रदेश २–०२–००२ प १६५७ नम्बरको मोटरसाइकल अनियन्त्रित भई विद्युतको पोलमा ठोक्किँदा चालक धनौजी गाउँपालिका–५ का २६ वर्षीय अजयकुमार मण्डलको मृत्यु भएको छ।

बिहीबार राति दुर्घटना हुँदा गम्भीर घाइते भएका मण्डलको प्रादेशिक अस्पताल जनकपुरमा उपचारको क्रममा शुक्रबार बिहान मृत्यु भएको प्रहरीले जनाएको छ।

यस्तै, बैतडी र ताप्लेजुङमा भीरबाट लडेर २ महिलाको ज्यान गएको छ। बैतडीको पाटन नगरपालिका–९ सल्लेबासा बस्ने ४० वर्षीया निर्मला महराको भीरबाट लडेर मृत्यु भएको प्रहरीले जनाएको छ।

गौलासैन भीरमा खानेपानीको पाइप लाइनमा काम गरिरहेको अवस्थामा लडेर गम्भीर घाइते भएकी महराको डडेलधुरा अस्पतालमा उपचारको क्रममा शुक्रबार बिहान मृत्यु भएको प्रहरीले जनाएको छ।

ताप्लेजुङको मिक्वाखोला मेरिङदेन गाउँपालिका–६, भिलामकी १८ वर्षीया दिकी शेर्पाको मृत्यु भएको छ।

घाँस काट्न गएकी शेर्पा घर फर्किएपछि खोज्ने क्रममा मिक्वाखोला गाउँपालिका–५ बल्देनस्थित भीरबाट लडेर मृत्यु भएको अवस्थामा भेटिएको प्रहरीले जनाएकोे छ।

सिराहको अर्नमा गाउँपालिका–४, लक्ष्मीपुरका २४ वर्षीय मिथिलेश कुमार सिंहको करेन्ट लागेर बिहीबार साँझ मृत्यु भएको छ।
स्थानीय हनुमान मन्दिरमा पानीको मोटरमा पानी पिउन जाँदा करेन्ट लागेर गम्भीर घाइते भएका मिथिलेसको विराट नर्सिङ होम विराटनगरमा उपचारको क्रममा शुक्रबार बिहान मृत्यु भएको प्रहरीले जनाएको छ।

सप्तरी र गोरखामा दुई जना वृद्ध मृत अवस्थामा भेटिएका छन्। सप्तरीको डाक्नेश्वरी नगरपालिका–७, ब्रम्हपुरस्थित गहुँबारीमा परिचय नखुलेका एक वृद्ध मृत अवस्थामा भेटिएकोे प्रहरीले जनाएकोे छ।

यस्तै, गोरखा अजिरकोट गाउँपालिका–४, फुरफुरेस्थित जंगलमा ९० वर्षीय शुकदेव लामिछाने मृत अवस्थामा भेटिएको प्रहरीले जनाएको छ। लामिछाने फागुन ३० गतेदेखि बेपत्ता भएको प्रहरीले जनाएकोे छ।