कञ्चनपुर- बिहीबार बिहान कञ्चनपुरको भीमदत्त नगरपालिका १२ ओदाली क्षेत्र नजिक नदीमा शव फेला परेको हो। जिल्ला प्रहरी कार्यालय कञ्चनपुरका प्रवक्ता रवीन्द्रप्रसाद पौडेलले फेला परेको शवको पहिचान नभएको बताए।
बुधबार साँझ महाकाली नदी झोलुङ्गे पुल भन्दा दक्षिण एक युवक डुबेर बेपत्ता भएका थिए, आज फेला परेको शव झोलुङ्गे पुल भन्दा उत्तरतिर फेला परेको हो ।
‘हिजो कुन मानिस डुबेको हो भन्ने बारेमा खोजिकार्य भईरहेको छ,’ प्रहरी प्रवक्ता पौडेलले भने, ‘आजको पनि पहिचान भएको छैन्।’ उक्त शव एक दुईदिन अघि नै बगेर आएको अनुमान गरिएको छ।
भीमदत्त र महाकाली नगरपालिका जोड्ने लामो झोलुङ्गेपुल बन्द भएपछि स्थानीयले कतै भारतबाट आएका व्यक्ति भाग्न खोज्दा डुबेको हुनसक्ने अनुमान गरेका छन्।
महाकाली नदीमा फेला परेको शव पोष्टमार्टमका लागि महाकाली अस्पतालमा ल्याईएको छ ।
लकडाउनका कारण दार्चुलादेखि कञ्चनपुरसम्मका नाका बन्द भएपछि भारतबाट फर्किएका केही नेपालीले भारतीय सीमा क्षेत्र धार्चुलाबाट महाकालीमा हाम फालेर नेपाल प्रवेस गरेका थिए ।
कतै यि व्यक्ति पनि महाकाली नदी पार गरेर नेपाल प्रवेश गर्न खोज्दा डुबेका त होइनन् भन्ने आशंका गरिएको छ।