जनकपुरधाम– सूर्य उपासनाको पर्व पोखरी, तलावलगायतका जलाशयमा मनाइन्छ । मिथिलाञ्चल क्षेत्रमा कार्तिक र चैत महिना गरी वर्षमा दुईपटक छठ मनाइने गरिन्छ । सोमबार जनकपुरसहित सम्पूर्ण मिथिलाञ्चलमा चैते छठअन्तर्गत सन्ध्याकालीन अर्घ दिइएको छ ।
तर, यसपटक अर्घ दिन ब्रतालुहरु पोखरी तथा जलाशयमा पुग्न पाएनन् । उनीहरुले छठ पर्व घरमै मनाएका छन् । घरमै छठ मनाइएको सम्भवतः यो पहिलो पटक रहेको बुढापाकाहरु बताउँछन् ।
यसअघिका वर्षहरुमा चैते छठमा भरिभराउ रहने जनकपुरका गंगा सागर, धनुष सागर, अंगराजसर लगायतका जलाशयहरु यसपटक सुनसान छ । चैते छठको लागि दुई–चार दिनअघिनै सरसाजवटलगायतका तयारी थालिएपनि यसपटक कुनै तयारी गरिएको छैन ।
विश्वभर फैलिएको कोरोना संक्रमण रोकथाम गर्ने उद्देश्यले ‘लकडाउन’ भएपछि ब्रतालुहरुले आ–आफ्नो घरमै छठ पर्व मनाएका छन् ।ब्रतालुहरुले आँगनभित्रै घेरा हालेर पानी जम्मा गरी जलाशयको आकार दिएर अस्ताउँदै गरेको सूर्यलाई अर्घ दिएका छन् । मंगलबार बिहान ब्रतालुहरुले उदाउँदो सूर्यलाई अर्घ दिएपछि यस वर्षको चैते छठ सकिने छ ।
कोरोना संक्रमणको सम्भावनालाई हेर्दै स्थानीय प्रशासनले समेत सार्वजनिक स्थानमा छठ पर्व नमनाउन ब्रतालुहरुलाई आग्रह गरेको थियो ।जनकपुरभित्र ब्रतालुहरुले घरभित्रै छठ मनाएपनि छेउछाउको ग्रामीण भेगहरुमा भने सार्वजनिक स्थानमा छठ नमनाउन स्थानीय प्रशासनले दिएको निर्देशनविपरित ब्रतालुहरुले पोखरीसम्म पुगेर छठ मनाएका छन् ।
कार्तिक महिनामा छठ गर्नेहरुको संख्या धेरै रहेपनि चैते छठ मनाउने कम हुन्छ।