जाजरकोट- क्वारेन्टाइनमा बसेकाहरुको तथ्यांक संकलन गरेर घर फर्किरहेका एक वडा अध्यक्षको अज्ञात समुहले खुट्टा भाँचेको छ।
जाजरकोटको छेडागाड नगरपालिका-११ का वडा अध्यक्ष ५२ वर्षीय चक्रबहादुर सिंहको आइतबार राती अज्ञात समूहले खुट्टा भाँचेको प्रहरीले जनाएको छ।
राति ९ बजेको समयमा छिमेकी गाउँबाट एक्लै घरतर्फ फर्किरहेको बेला सिंहलाई ४–५ जनाको समूहले धकेलेको जिल्ला प्रहरी प्रमूख प्रहरी नायव उपरीक्षक किशोर कुमार श्रेष्ठले जानकारी दिए।
बाटोबाट करिव ५ मिटर तल खसेका सिंहको दायाँ खुट्टाको पिँडुला भाँचिएको र हातमासमेत चोट लागेको श्रेष्ठले जानकारी दिए। सिंहलाई उपचाका लागि सुर्खेत पठाएइको प्रहरीले जनाएको छ।
वडाअध्यक्ष सिंहमाथि के कारणले आक्रमण गरियो भन्ने बारे नखुलेको र घट्नाबारे अनुसन्धान भैरहेको प्रहरीले जनाएको छ।