काठमाडौं - परराष्ट्रमन्त्री प्रदीप ज्ञवालीले कोरोना भाइरस संक्रमण हुन नदिन सरकारले सम्पूर्ण शक्ति लगाएर काम गरिरहेको बताएका छन्।
उनले आइतबार ट्विट गर्दै भनेका छन्, 'विकसित देशलाई समेत कोरोना भाइरस नियन्त्रणमा लिन हम्मेहम्मे परिरहेका बेला महामारीविरुद्ध सरकार सम्पूर्ण शक्तिका साथ लागि परेको छ।' उनले उपचारका लागि चीनबाट सामग्री आइसकेकाले नआत्तिन आग्रह गरेका छन्।
मन्त्री ज्ञवालीले भनेका छन्, 'धरानबाट नमुना परीक्षण सुरु भएको छ। छिटै अन्यन्त्र पनि बिस्तार गरिँदै छ।' उनले कोरोना संक्रमण नियन्त्रणका लागि अहोरात्र खटिएका सरकारी अधिकारी र स्वास्थ्यकर्मीलाई साथ र हौसला दिन पनि आग्रह गरेका छन्।
नेपाल वायुसेवा निगमको वाइडबडी जहाजले आइतबार बिहान चीनबाट मेडिकल सामग्री ल्याएकाे छ। चीनको ग्वाङझाओबाट मेडिकल सामग्री लिएर विमान बिहान ५ बजे त्रिभुवन अन्तर्राष्ट्रिय विमानस्थल आइपुगेको हो।