गत डिसेम्बरको तेस्रो साता चीनमा सुरु भएको कोरोना भाइरस विश्वभर फैलिसकेको छ। विश्व स्वास्थ्य संगठनका अनुुसार कोरोनाबाट २०१ वटा मुलुक प्रभावित छन्।
शनिबारसम्मको तथ्यांकअनुसार संक्रमितको संख्या ६ लाख नाघिसकेको छ। यसमा सबैभन्दा बढी अमेरिकामा १ लाख ४ हजार ८ सय ६५, इटालीमा ८६ हजार ४ सय ९८, चीनमा ८१ हजार ९ सय ९६, स्पेनमा ७२ हजार २ सय ४८ र जर्मनीमा ५३ हजार ३ सय ४० छन्।
अहिले यूरोप र अमेरिकामा बढी सक्रिय रहेको यो भाइरस चीनपछि सुरुमा मध्यपूर्व पुगेको थियो । कोरोनाबाट नराम्ररी प्रभावित भएको इरानमा अहिले पनि प्रकोप साम्य भएको छैन।
शनिबारमात्र इरानमा १३९ जनाको मृत्यु भएको छ। योसँगै इरानमा कोरोनाबाट मर्नेको सख्या २५ सय १७ पुगेको छ। त्यहाँ देशको कुल बजेटको २० प्रतिशत हिस्सा कोरोनासँग जुध्न खर्च भइरहेको छ।
उता, कतारमा शनिबार कोरोना भाइरसबाट पहिलोपटक एकजनाको मृत्यु भएको छ भने संक्रमितको संख्या ५९० पुगेको छ।
मध्यपूर्वका अन्य देशहरु साउदी अरेबिया, टर्की, इजिप्ट, इराक, सिरिया, युएई, लेबनान भने कोरोनाबाट खासै प्रभावित छैनन्।