काठमाडौं– कपिलवस्तुमा १३ वर्षीय एक बालिका छिमेकी युवाबाट बलात्कृत भएकी छन्।
मायादेवी गाउँपालिका–४, गौरामा बिहीबार राति १३ वर्षीया एक बालिका छिमेकी २५ वर्षीय एजाज मुसलमानबाट बलात्कृत भएको बालिकाको परिवारले जनाएको छ।
राति १० बजे घर अगाडिको धारामा पानी भर्ने क्रममा बालिकालाई घरपछाडि लगेर बलात्कार गरेको बालिकाकी आमाले जानकारी दिइन्। बालिकाको मुखमा कपडा कोचेर बलात्कार गरिरहेको समयमा छिमेकीले देखेर उद्दार गरेको स्थानीय हृदयराम यादवले बताए।
बालिकालाई उपचारको लागि तौलिहवा अस्पताल लगिएको परिवारले जनाएको छ। गाउँलेले बलात्कार गर्ने युवालाई प्रहरीको जिम्मा लगाउन खोजे पनि उनको परिवारले गाउँलेबाट खोसेर भगाएको यादवले बताए।
जिल्ला प्रहरी कार्यालयका प्रहरी निरीक्षक अमित भण्डारीले पीडित पक्ष केहीबेरअघि प्रहरीमा आएको र घटनाबारे अनुसन्धान भइरहेको बताए। “बालिका बलात्कृत भएको भनेर आफन्तहरू आएका छन्, हामी बुझ्दै छौं,” भण्डारीले भने, “बालिकाको स्वास्थ्य परीक्षण पनि भइरहेको छ।”