प्रादेशिक अस्पतालमा नर्सका लागि पञ्जा र गाउनसमेत छैन

जनकपुरधाम– विश्वभर फैलिएको कोरोना भाइरस संक्रमण रोकथाम गर्न सरकारले अहिले ‘लकडाउन’ गरेको छ । शंकास्पद बिरामीको जाँच तीव्र बनाई रोग निदान गर्ने भनिएको छ।

तर, प्रदेश २ को जनकपुरस्थित प्रादेशिक अस्पतालले भने कोरोना संक्रमणका शंकास्पद बिरामीको जाँच गर्ने हालसम्म कुनै तयारी गर्न सकेको छैन ।

प्रदेश सरकारले स्वास्थ्यकर्मीलाई आवश्यक सुरक्षा उपकरण उपलब्ध गराउन नसकेपछि प्रादेशिक अस्पतालमा शंकास्पद बिरामीको जाँच हुन नसकेको हो । कतिपय शंकास्पद बिरामीहरुलाई जाँचै नगरी सोझै काठमाडौं पठाउने गरेको पाइएको छ ।

प्रदेश सरकारको सामाजिक विकास मन्त्रालय मातहत रहेको प्रादेशिक अस्पतालमा स्वास्थ्यकर्मीले प्रयोग गर्ने स्यानिटाइजर, पञ्जा, मास्क, गाउनलगायतका सामान्य सामग्रीसमेत उपलब्ध हुन नसकेको कार्यरत नर्सहरु बताउँछन् ।

अस्पतालमा कार्यरत नर्सहरुले आफूहरु स्वयं सुरक्षित नरहेकोले बिरामी नजिक जान कठिनाइ भएको बताएका छन् । अस्पतालले आफूहरुलाई पञ्जा, स्यानिटाइजर, गाउनलगायत सामान्य सामग्रीसमेत उपलब्ध नगराएको उनीहरुको भनाइ छ।

सुरक्षाका आवश्यक सामग्रीहरु अस्पतालले उपलब्ध नगराएसम्म आफूहरु काम नगर्ने उनीहरुको भनाइ छ । ‘अहिले विश्वव्यापी रुपमा कोरोना संक्रमण फैलिएको छ, हामीलाई पीपीई त परै जाओस्, पञ्जा, गाउनसमेत उपलब्ध छैन, कसरी बिरामी नजिक जाने ?,’ अस्पतालमा कार्यरत नर्स भन्छन्।

कोरोना संक्रमणको हल्ला चलेदेखि आफूहरुले सुरक्षा सामग्री उपलब्ध गराउन भने पनि अस्पताल व्यवस्थापनदेखि प्रदेश सरकार र स्थानीय सरकारले कुनै चासो नदिएको नर्स विभा कर्णले बताइन् ।

‘कोरोना संक्रमण रोकथाम गर्न प्रदेश सरकारले चासो लिनुपर्ने हो तर त्यसतर्फ सरकारले ध्यान दिएको छैन । अहिलेसम्म हामी जोखिम मोलेर काम गरिरहेका छौं । तर, अब सम्भव देखिन्न । हाम्रो आफ्नै सुरक्षाको कुनै ग्यारेन्टी भएन, कसरी काम गर्नु ? कर्णले बताइन् ।

कर्णले थपिन्, ‘डाक्टरहरु राउण्डमा आउन छोडिसके। आए पनि दूरी बनाएर बस्न भन्नुहुन्छ। बिरामीसँग दूरी बनाएर बस्ने हो भने मेडिकेसन कसरी गर्ने ? बिरामीको हेरचाह गर्न हामी पनि सुरक्षित हुनुपर्यो नि।’

कोरोना संक्रमण रोकथाम गर्न प्रदेश सरकारले गम्भीरताका साथ पहल गर्न नसकेको भन्दै व्यापक आलोचना भइरहेको छ । प्रदेश सरकारले प्रत्येक गाविसलाई ५०–५० लाख रुपैयाँ पठाएको छ ।

तर, अहिलेको अवस्थामा रुपैयाँभन्दा कोरोनाको शंकास्पद बिरामीलाई चेकजाँच गर्न आवश्यक उपकरण, क्वारेन्टाइन, आइसोलेसन बेड, भेन्टिलेटर, ल्याबलगायतको जरुरी रहेकोले त्यसतर्फ सरकारले ध्यान दिनुपर्ने स्वास्थ्यकर्मीहरु बताउँछन् ।