काठमाडौंः श्रमिकहरूका लागि विशेष प्याकेजको घोषणा गर्न नागरिक अगुवाहरूले अपिल गरेका छन्।
कल्याण श्रेष्ठ, सुशीला कार्की, प्रा. केदारभक्त माथेमा, दुर्गा सुवेदी र रवीन्द्र मिश्रले संयुक्त रुपमा प्रेस विज्ञप्ति जारी गर्दै दैनिक ज्यालादारीमा काम गर्नेहरूलाई सरकारले विशेष व्यवस्था गर्नुपर्ने बताएका हुन्।
विज्ञप्तिमा भनिएको छ, “दैनिक ज्यालादारीमा आफ्नो र परिवारको जीवन निर्वाह गर्ने न्यून आय भएकाहरूका लागि तुरून्तै विशेष प्याकेजको घोषणा गरोस् भनि हामी सरकारसँग जोडदार माग गर्दछौँ।”
प्याकेजमा निःशुल्क रासन, बेतनसहितको बिदा, बालबच्चाको स्कूलमा फि मिनाह, निःशुल्क उपचारलगायतका विषय समेट्न अपिल गरिएको छ।
उनीहरूले यो संकटबाट पार पाउन राजनीतिक आरोप, प्रत्यारोपबाट माथि उठेर काम गर्नुपर्ने धारणा राखेका छन्।
विश्वव्यापी महामारीको रूपमा फैलिरहेको कोरोना भाइरस संक्रमण (कोभिड १९) नियन्त्रणका लागि सरकारले लिएका कदमको उनीहरूले स्वागत गरेका छन्।