जनकपुरधामं– कन्टेनर चढेर वीरगंज पुगेकाहरुको प्रहरीले स्वास्थ्य परीक्षण गराएको छ । ‘लकडाउन’ अवज्ञा गरी कन्टेनर चढी वीरगंज पुग्ने तीन महिलासहित ५४ जनाको स्वास्थ्य परीक्षण गरिएको हो ।
मानिस बोकेर वीरगंज पुगेको कन्टेनरलाई मंगलबार राति घण्टाघर नजिकबाट प्रहरीले पक्राउ गरेको थियो । काठमाडौंबाट भरतपुर–हेटौंडा हुँदै वीरगंज पुगेको ना ५ ख ९५५२ नम्बरको कन्टेनर चढेर उनीहरु वीरगंज पुगेका थिए । प्रहरीले कन्टेनर चालक शिवनारायण महरालाई पनि नियन्त्रणमा लिएको छ ।
पर्साका सहायक प्रमुख जिल्ला अधिकारी ललित बस्नेतले केन्टनर चढेर आएकाहरुको क्वारेन्टाइनमा स्वास्थ्य परीक्षण भइरहेको बताएका छन् । उनीहरुबारा, पर्सा र रौतहट जिल्लाका वासिन्दा रहेको उनले जानकारी दिएका छन् ।
पक्राउ परेका सबैजनाको स्वास्थ्य परीक्षणपश्चात सेल्फक्वारेन्टाइनमा बस्ने गरी परिवारको जिम्मा लगाइने बस्नेतले बताए । यसैगरी कन्टेनर चालक महराविरुद्ध मुद्दा दर्ता भएको उनले जनाएका छन् ।
कन्टेर चढेर वीरगंज आएकाहरु काठमाण्डौं, हेटौंडालगायतको स्थनमा व्यापार व्यवसाय र मजदुरीका लागि बस्दै आइरहेका थिए । मंगलबारदेखि लकडाउन भएपछि घर फर्किन कुनै सवारी साधन नपाएपछि लरीको खाली कन्टेरटर चढेर वीरगंजसम्म आइपुगेका हुन् ।
कन्टेनर चालकले उनीहरुसँग प्रति व्यक्ति दुई सय रुपैयाँ भाडा असुल गरेको बताइएको छ । गाडीमा बसाउन नमानेपनि जबरजस्ती बसेको चालक महराले प्रहरीसमक्ष बयान दिएका छन् ।
लकडाउन उल्लंघन गरी यात्रु ओसार्ने चालक महराविरुद्ध संक्रामक रोग ऐन २०२० आ स्थानीय प्रशासन ऐन २०२८ अनुसार मुद्दा चलाइने साहायक प्रमुख जिल्ला अधिकारी बस्नेतले जानकारी दिएका छन् ।