बुधबार, जेठ १४, २०७७

समाचार

नेकपा सचिवालयमा एमएसीसीबारे छलफल, प्रधानमन्त्री ओली अनुपस्थित

1588668826baluatar.jpg

सत्तारुढ दल नेपाल कम्युनिष्ट पार्टी (नेकपा)को सचिवालय बैठकमा अमेरिकी सहयोग परियोजना एमसीसीमाथि छलफल भए पनि कुनै निर्णय भने हुन सकेन।

दातृ निकायलाई आश्वस्त पार्न एमसीसी परियोजना अगाडि बढाउनुपर्ने भन्दै परराष्ट्र मन्त्री प्रदीप ज्ञवालीले आग्रह गरेपछि आज सचिवालयमा छलफल भएको हो।

बैठकमा नेकपा अध्यक्ष एवं प्रधानमन्त्री केपी शर्मा ओली सहभागी भएनन्। छलफलमा सहभागी एक नेतका अनुसार बैठकमा अर्का अध्यक्ष प्रचण्डले एमसीसीबारे छलफलको प्रस्ताव राखेका थिए। तर, पार्टीमा पर्याप्त छलफल हुनुपर्ने भन्दै कुनै निर्णय भने भएन।

प्रचण्डले एमसीसीबारे स्थायी कमिटीको बैठकमा छलफल गरेर मात्रै अघि बढाउनुपर्ने धारणा राखेका थिए। 

बैठकअघि नेताहरुले एमसीसी नेपालका कार्यकारी निर्देशक खड्गबहादुर विष्ट र नेपाल विद्युत् प्राधिकरणका कार्यकारी निर्देशक कुलमान घिसिङसँग पनि छलफल गरेका थिए।

नेकपामा वरिष्ठ नेता झलनाथ खनालको नेतृत्वमा बनेको एमसीसी कार्यदलले संशोधनसहित पारित गर्नुपर्ने सुझाव दिएको छ भने परराष्ट्र मन्त्री ज्ञवाली भने जस्ताको त्यस्तै पारित गराउने पक्षमा छन्।

एमसीसीमाथिको छलफल सकिएपछि नेकपाको सचिवालयमा बजेटलगायतको विषयमा छलफल पनि भएको छ।

प्रतिक्रिया दिनुहोस्