लकडाउनको निर्णय कार्यान्वयनमा, सडक र बजार बन्द

कोरोना भाइरसको सम्भावित जोखिमलाई मध्यनजर गरेर पूरै देश लकडाउन गर्ने सरकारको निर्णय कार्यान्वयनमा आएको छ। आज बिहान ६ बजेदेखि लागू हुनेगरी भएको हिजोको निर्णयअनुसार मानिसहरु घरबाट निस्किएका छैनन्।

काठमाडौं उपत्यकाको सडक पूरै सुनसान छ भने बजार पनि पूर्ण रुपमा बन्द छन्। सडकमा सुरक्षाकर्मी भने उल्लेख्य देखिन्छन्। अत्यावश्यक सेवा सञ्चालनका सवारी साधनबाहेक अन्य चलेका छैनन्। बिहानै सडकमा निस्किएका केही सवारीसाधन प्रहरीले फर्काइदिएको छ ।

परिचयपत्रको चेकजाँचलाई पनि कडाइ गरिएको छ । लगभग कर्फ्युको अवस्था सडकमा छ। माइकिङबाट प्रहरीले सर्वसाधरणलाई भित्रै बस्न र घर बाहिर ननिस्कन आग्रह गर्दै हिँडेको छ ।

भित्रि सडकमा भने मानिसहरु केही मात्रामा हिँडेका देखिन्छन् र साना पसलहरु पनि खुलेका छन्।

मानिसहरुलाई घर बाहिर निस्कन नदिने र अत्यावश्यक सेवामात्रै सञ्चालन गर्न दिने निर्णय सरकारले गरेको थियो।