भारतमा सबै आन्तरिक उडान स्थगित

एजेन्सी- कोरोना भाइरस संक्रमणको जोखिमबाट जोगिन भारतले सबै आन्तरिक उडान स्थगित गर्ने भएको छ।

बुधबारदेखि लागू हुने गरी भारतले सबै आन्तरिक उडान अर्को सूचना नभएसम्मका लागि स्थगित गर्ने निर्णय गरेको हो।

भारतको यो निर्णयसँगै भारतका सबैजसो विमानस्थल बन्द हुने भएका छन्। भारतले अन्तर्राष्ट्रिय उडान सबै बन्द गरिसकेको छ।

देशभरको रेल सञ्जाल बन्द गरिसकिएको छ। थुप्रै प्रान्तहरुले एकअर्कासँगको सीमा बन्द गरिसकेका छन्।

भारतमा कोरोना भाइरसको संक्रमण फैलिने गति बढेपछि भारतले यस्तो निर्णय लिएको हो।

उसले नेपालसहित सबै छिमेकी देशसँगको नाकासमेत बन्द गरिसकेको छ।

भारतमा अहिलेसम्म कोरोनाका ४ सय १५ संक्रमित भेटिएका छन् भने ७ जनाको मृत्यु भइसकेको छ।