जनकपुरधाम- कोरोना भाइरस संक्रमणको जोखिम न्युनिकरणका लागि जनकपुरका २० स्थानमा हात धुने व्यवस्था गरिएको छ।
जनकपुर उद्योग वाणिज्य संघ र नेपाल प्रहरी श्रीमती संघको संयुक्त सहयोगमा जनकपुरको २० वटा चोकमा हात धुन पानी र ह्यान्डवासको व्यवस्था गरिएको हो।
कोरोना संक्रमणको जोखिम कम गर्न हात धोइराख्नुपर्ने भएकोले जनकपुरका २० वटा चोकमा ड्रममा पानी र ह्यान्डवासको व्यवस्था गरिएको उद्योग वाणिज्य संघका वरिष्ठ उपाध्यक्ष जितेन्द्रप्रसाद साहले जानकारी दिए।
साहका अनुसार जनकपुरको शिवचोक, जनक चोक, भानुचोक, जिरोमाइल, रामानन्द चोकलगायतका स्थानमा पानी र ह्यान्डवासको व्यवस्था गरिएको छ।
कोरोना संक्रमणको जोखिमबाट जोगिन चोकहरुमा राखिएको पानी र ह्यान्डवासको प्रयोग गर्न सर्वसाधारणलाई वाणिज्य संघ र नेपाल प्रहरी श्रीमती संघले आग्रह गरेको छ।
पानी र ह्याण्डवासको सुरक्षाको लागि सबै स्थानमा प्रहरी खटिने बताइएको छ।