बुधबार, जेठ १४, २०७७

समाचार

कोरोना भाइरस : बंगलादेशी कम्पनीले बनायो रेमडेसिवियरको जेनेरिक संस्करण

1590137738remdesiviar.jpg

बंगलादेशको औषधि उत्पादक कम्पनी बेक्सिम्कोले एन्टिभाइरल औषधि रेमडेसिवियरको एउटा जेनेरिक संस्करण तयार गरेको छ।

उक्त औषधिको जेनेरिक संस्करण उत्पादन गर्ने यो विश्वकै पहिलो कम्पनी हो।

रेमडेसिवियरको मूल रुप भने अमेरिकाको गिलिड साइन्सेज नामक कम्पनीले तयार गरेको हो, जुन इबोला भाइरसको उपचारका लागि प्रयोग गरिएको थियो।

हालै अमेरिकामा भएको एक अध्ययनमा रेमडेसिवियरले कोरोना भाइरसका गम्भीर बिरामीको रिकभरी समय कम गर्न मद्दत पुगेको पाइएको थियो। यद्यपि, यो औषधिका कारण मानिसलाई जिवित राख्न भने उल्लेख्य सफलता मिलेको छैन।

विशेषज्ञहरुले रेमडेसिवियरलाई कोरोना भाइरसको लागि ‘जादूको क्याप्सुल’को रुपमा नलिन पनि चेतावनी दिइरहेका छन्।

यद्यपि, कोरोनाको कुनै औषधि वा भ्याक्सिन बन्न नसकिरहेको अवस्थामा कैयौं देश यो औषधि परीक्षण गर्न इच्छुक छन्।

बेक्सिम्कोको यो उपलब्धिबाट दक्षिण एसियाली मुलुकमा यो औषधि तत्काल आपूर्ति हुन सक्ने निश्चित भने भएको छ। औषधि उत्पादनका लागि बेक्सिम्कोले भारत तथा पाकिस्तानमा साझेदारसमेत खोजिरहेको बताइएको छ।

बीबीसी

 

प्रतिक्रिया दिनुहोस्