आइतबार, जेठ १८, २०७७

समाचार

१० हजार घुस बुझाउने सिँचाइ डिभिजन प्रमुख पक्राउ

इटहरी- जलस्रोत तथा सिँचाइ विकास डिभिजन कार्यालय मोरङका डिभिजन प्रमुख आनन्दकुमार झा घुस बुझाएको आरोपमा पक्राउ परेका छन्।

आर्थिक मामिला तथा योजना मन्त्रालयको बजेट योजना तथा कार्यक्रम महाशाखाका कर्मचारी विदुर पौडेललाई १० हजार बुझाएको आरोपमा झा पक्राउ परेका हुन्।

झाले उक्त रकम खाममा पौडेलको कार्यकक्षस्थित टेबलको घर्रामा राखिदिएका थिए। उनले पौडेललाई १० हजार नगद दिए पनि पौडेलले अस्वीकार गरेको बताएका छन्। उक्त घटनापछि शाखा अधिकृत पौडेलले भ्रष्टाचारजन्य कसुरमा सजाय गराई पाऊँ भनी निवेदन दिएका थिए।

प्रदेश १ का मुख्यमन्त्री शेरधन राईको आदेशमा अख्तियार दुरुपयोग अनुसन्धान आयोगको इटहरीस्थित कार्यालयबाट खटिएको टोलीले झालाई प्रक्राउ गरेको छ। झाले साे रकम कुन प्रयाेजनका लागि घुस रकम दिएका थिए भन्नेबारे अनुसन्धान भइरहेकाे अख्तियारले जनाएकाे छ।

आर्थिक मामिला तथा योजना मन्त्रालयका कर्मचारीमाथि महिनौंंदेखि अन्य मन्त्रालय तथा कार्यालयको फाइल रोक्दै आएको आरोप छ।

प्रतिक्रिया दिनुहोस्