काठमाडौं- सरकारले लागू गरेको नियम उल्लघंन गर्दै नेपाल आईपुगेका ६१ जनालाई क्वारेन्टाइनमा पठाइएको छ।
दुई विदेशी विमानमा आइपुगेका उनीहरुलाई खरिपाटीस्थित नेपाल विद्युत प्राधिकरणको तालिम केन्द्रस्थित क्वारेन्टाइनमा पठाइएको हो।
शनिबार एयर इन्डिया र थाइ एयरवेज ६१ जना यात्रु ल्याएर काठमाडौंस्थित त्रिभुवन अन्र्तराष्ट्रिय विमानस्थलमा अवतरण भएका थिए।
विमानस्थल अध्यागमन विभागका प्रमुख सागर आचार्यका अनुसार थाइ एयरवेजले ४९ र एयर इन्डियाले १२ जना यात्रु ल्याएको थियो।
सरकारले गएराति १२ बजेपछि युरोप, खाडी, मलेसिया, इरान, दक्षिण कोरिया र जापानबाट कुनै पनि यात्रु नेपाल आउने नपाउनेगरी प्रतिबन्ध लगाएको थियो। प्रतिबन्ध लागेका युरोप, खाडी मुलुक मलेसिया, इरान, दक्षिण कोरिया र जापानबाट यात्रुहरूले भारत वा थाइल्याण्डलाई ट्रान्जिट बनाएर नेपाल आउन पाउँदैनन्।
शनिबार नेपाल आइपुगेकाहरु जापान, मलेसिया र कतार लगायतका देशबाट अन्यत्र ट्रान्जिट बनाएर आएको बताइएको छ।
क्वारेन्टाइनमा पठाइएकाहरु अब १४ दिनसम्म त्यहाँ बस्नुपर्नेछ।