राजधानीबाट तीन दिनमा चार लाखभन्दा बढी बाहिरिए

काठमाडौं– कोरोना भाइरस (कोविड–१९) संक्रमणले विश्वभर महामारीको रूप लिएपछि यसको त्रासले राजधानीबाट बाहिरिनेहरू बढेका छन्। पछिल्लो तीन दिनयता चार लाखभन्दा बढीले सडक मार्ग हुँदै राजधानी छाडेका छन्।

नेपाल यातायात व्यावसायी महासंघका महासचिव सरोज सिटौलाका अनुसार कोरोना संक्रमण त्रासले बुधबारयता चार–पाँच लाखले राजधानीबाट बाहिरिसकेकाे बताए।

“कोरोना संक्रमण त्रासले राजधानीबाट घर फर्कनेको चाप बढेपछि गाेंगबुस्थित नयाँ बसपार्कमा थामिनसक्नुको भिड छ,” उनी भन्छन्। 

सामान्य अवस्थामा राजधानीबाट दैनिक ५० हजारको हाराहारीमा मानिसहरू बाहिरिने गरेको भए पनि पछिल्लो समय यो संख्या तेब्बर पुगेको छ। पछिल्लो समय दैनिक एक लाख ३० हजारदेखि एक लाख ५० हजार जतिले राजधानी छाड्ने गरेको महासचिव सिटौला बताउँछन्।

कोरोना संक्रमणबाट सतर्कता अपनाउन भन्दै सरकारले चैत १० देखि लामो दूरीका यातायात बन्द गर्ने निर्णय गरेको छ।

यसले राजधानी छाड्नेको चाप आज झन् बढेको उनले बताए। “छोटो दूरीमा त समस्या छैन,” उनले भने, “लामो दूरी नेपालगन्ज, महेन्द्रनगर, दाङलगायत क्षेत्रमा समस्या हुने देखिएको छ।” यसको समाधानका लागि छलफल भइरहेको उनले बताए।

राजधानी सुनसान

कोरोना त्रासले राजधानी सुनसान छ। राजधानीका मल, सुपरमार्केट, पसलमा ग्राहक ह्वात्तै घटेका छन्। सडकमा मानिसको चाप न्यून छ।
अरु बेला भरिभराउ देखिने रेस्टुरेन्ट पनि अहिले खाली देखिन्छन्।

राजधानीको अनामनगरस्थित बाग्लुङे घुम्टे तन्दुरीमा कार्यरत एक कर्मचारी पछिल्लो समय ग्राहक आधाजति घटेको बताउँछन्। “कोरोना त्रास बढेपछि अहिले ग्राहक घटेका छन्,” उनी भन्छन्।