नयाँ दिल्ली– निर्भया सामूहिक बलात्कार र हत्यामा संलग्न चार दोषीलाई शुक्रबार फाँसी दिइएको छ।
समाचार एजेन्सीका अनुसार बलात्कारमा दोषी ठहर गरिएका मुकेश सिंह, विनय शर्मा, अक्षयकुमार सिंह र पवन गुप्तालाई दिल्लीको तिहाड जेलमा बिहान साढे ५ बजे फाँसी दिइएको हो।
फाँसीपछि जेलका निर्देशक सन्दीप गोयलले चार जनालाई मृत घोषित गरे। गोयलका अनुसार चारै जनालाई एकैसाथ फाँसी दिइएको थियो।
फाँसीपछि निर्भयाकी आमा आशा देवीले छोरीले न्याय पाएको भन्दै न्यायपालिकालाई धन्यवाद दिइन्। “म न्यायपालिका, मिडिया, राष्ट्रपति तथा तपाईंहरू सबैप्रति आभारी छु। सात वर्षको संघर्ष आज निष्कर्षमा पुगेको छ,” उनले भनिन्।
उनले भारतका महिलालाई अझै सुरक्षित बनाउन लडाइँ जारी राख्ने बताइन्।
फाँसीअघि चारै जना दोषीले आफूहरूलाई फाँसी नदिन माग गर्दै दिल्ली हाईकोर्ट र सुप्रिम कोर्टमा अपिल गरेका थिए। तर, दुवै कोर्टले उनीहरूको अपिल इन्कार गरेको थियो।
सन् २०१२ डिसेम्बर १६ मा राजधानी दिल्लीमा बसमा सवार २३ वर्षीया निर्भयामाथि ६ जनाले सामूहिक बलात्कार गरी सडकमा फालेका थिए। त्यसपछि अस्पताल भर्ना भएकी निर्भयाको डिसेम्बर २९ मा मृत्यु भएको थियो।
उक्त घटनामा संलग्न रहेको आरोपमा पक्राउ परेका ६ जनालाई दिल्ली हाईकोर्टले दोषी ठहर गरेको थियो। तीमध्ये एकले जेलमा आत्महत्या गरे भने एक जना नाबालिगलाई सुधार केन्द्र पठाइएको छ।