मंगलबार, जेठ २०, २०७७

समाचार

बाधाअड्काउ फुकाउन सर्वोच्चमा १९ न्यायाधीशको बृहत् पूर्ण इजलास

1573635613supreme_court_sarbochha.jpg
null

काठमाडौं- सर्वाेच्च अदालतले लकडाउनले गर्दा न्याय प्रक्रियामा देखा परेकाे उत्पन्न बाधाअड्काउ फुकाउन १९ न्यायाधीशको बृहत् पूर्ण इजलास गठन गरेको छ।

देशभरका अदालतका मुद्दा, म्याद, तारेख लगायतमा संकट उत्पन्न भएपछि सर्वोच्चले प्रधानन्यायाधीशसहितको १९ न्यायाधीश सम्मिलित बृहत् पूर्ण इजलास गठन गरेको हो।

सर्वोच्चका प्रवक्ता भद्रकाली पोखरेलले न्यायालयमा कानुनी जटिल्ता उत्पन्न गरेपछि बाधाअड्काउ फुकाउन बृहत् पूर्ण इजलास गठन गरिएको जानकारी दिए।

प्रशासनिक निर्णयबाट पनि हदम्याद, म्याद वा तारेख गुज्रिए के गर्ने भन्ने अन्योल देखिएपछि सर्वोच्चकै मुद्दा तथा रिट महाशाखाले प्रतिवेदन तयार पारेर इजलासमा पेस रेको थियो।

वैशाख २३ गते तयार पारिएको उक्त प्रतिवेदनमाथि वैशाख २४ गते सुनुवाइ गर्दै न्यायाधीशहरु विश्वम्भरप्रसाद श्रेष्ठ र प्रकाशकुमार ढुंगानाको इजलासले नेपाल बार र महान्यायाधिवक्ताको कार्यालयबाट लिखित बहस नोट मगाउने तथा मुद्दा सुनुवाइका लागि पूर्ण इजलासमा पठाउने आदेश गरेको थियो।

सोही आदेशअनुसार सोमबार बृहत् पूर्ण इजलास गठन भएको हो।

सर्वोच्चका सूचना अधिकारी देवेन्द्र ढकालले अदालती कामकारबाही रोकिँदा मुलुकभरका अदालतमा मुद्दा दर्ता गर्ने, हद म्याद, पेसी तारिख र कानुनी म्यादको विषयमा मौजुदा कानुनमा स्पष्ट कानुनी व्यवस्था नहुँदा यसलाई सम्बोधन गर्न कानुनी बाधाअड्काउ फुकाउन खोजिएको बताए।

यस अवधिमा फौजदारी मुद्दा दर्ता गर्ने म्याद, अनुसन्धान प्रक्रिया, गम्भीर फौजदारी कसुरमा निरन्तर सुनुवाइ, फास्ट ट्रयाक फैसलाको कारबाही, सेवाग्राही उपस्थित हुने म्यादजस्ता विषयमा निकै जटिलता उत्पन्न भएको छ।

‘यस्तो अवस्थामा मुलुकभरका अदालतले मुद्दा प्रक्रियामा फरकफरक मापदण्ड अपनाउँदा अन्योल र दुविधासमेत उत्पन्न हुने भएकाले एकरुपता कायम गर्न सर्वोच्चको इजलासबाटै निकास निकाल्ने प्रयास भएको छ’, ढकालले भने, ‘बृहत् पूर्ण इजलासले बाधाअड्काउ फुकाउनेछ।’

उक्त इजलासमा प्रधानन्यायाधीश चोलेन्द्रशमशेर राणासहित न्यायाधीशहरु दीपककुमार कार्की, मीरा खडका, हरिकृष्ण कार्की, विश्वम्भरप्रसाद श्रेष्ठ, ईश्वरप्रसाद खतिवडा, आनन्दमोहन भट्टराई छन्।

यस्तै इजलासमा अनिलकुमार सिन्हा, प्रकाशमानसिंह राउत, सपना प्रधान मल्ल, तेजबहादुर केसी, पुरुषोत्तम भण्डारी, बमकुमार श्रेष्ठ, टंकबहादुर मोक्तान, प्रकाशकुमार ढुंगाना, सुष्मलता माथेमा, कुमार रेग्मी, हरिप्रसाद फुयाल र मनोजकुमार शर्मा छन्।

२१ न्यायाधीशको दरबन्दी रहेको सर्वोच्चमा हाल रहेका २० न्यायाधीशमध्ये डम्बरबहादुर शाही उमेर हदका कारण अनिवार्य अवकाश लिने मिति एक महिनाभन्दा कम भएकाले विदामा छन्।

यस्तो पूर्ण बृहत् पूर्ण इजलास गठन भएको विरलै घट्ना हो। यसअघि करिब २६ वर्षपहिले पनि न्याय प्रशासन ऐनको तात्त्विक शब्दको भिन्नताबारे व्याख्या गर्न बृहत् पूर्ण इजलास गठन भएको थियो।

प्रतिक्रिया दिनुहोस्