‘मेरो साथमा चिट भेटिँदा स्कूलकै बेइज्जत भयो’

कपिलवस्तु– कपिलवस्तुमा कक्षा ८ को परीक्षा दिइरहेकी एक छात्राबाट अनुगमन टोलीले ‘चिट’ भेटाएपछि ती छात्राले आत्महत्या गरेकी छन्।

जिल्लाको शिवराज नगरपालिकास्थित नेपाल आदर्श माध्यमिक विद्यालयमा कक्षा ८ मा अध्ययनरत १८ वर्षीया छात्राले ‘सुसाइड नोट’ लेखेर आत्महत्या गरेकी हुन्।

ती छात्राले जिल्लाबाट आएको अनुगमन टोलीले आफ्नो साथमा चिट भेटाउँदा विद्यालयकोसमेत बेइज्जत भएको नोट लेखेर छोडेकी छन्। उनी मंगलबार घर नजिककै वनमा जामुनको रुखमा झुण्डिएको अवस्थामा फेला परेकोे प्रहरीले जनाएको छ।

इलाका प्रहरी कार्यालय चन्द्रौटाका इन्चार्ज प्रहरी निरीक्षक दिपेश खरेलका अनुसार छात्राले आफुले चिट चोरेको प्रति आत्मग्लानी गर्दै विद्यालयका प्रधानाध्यापकसँग माफी समेत मागेकी छन्।

आफ्नै कारणले विद्यालयकोसमेत बेइजत भएको उल्लेख गर्दै उनले ‘आफू कसैको सामु मुख देखाउन लायक नभएको र उक्त गल्तीलाई कसैले माफ नगर्ने पनि नोटमा उल्लेख छ।

जानकारहरुका अनुसार एकातिर परीक्षामा उत्कृष्ट नम्बर ल्याउनै पर्ने दबाब र अर्कोतिर कसैगरी अनुत्तीर्ण भइहाले समाज र परीवारले होच्याउने प्रवृत्तिले गर्दा यस्तो दुर्घटना हुने गर्छ।

अभिभावक र शिक्षकहरुले सबै विद्यार्थीको सिक्ने क्षमता एउटै हुँदैन र सबैका आ–आफ्ना विशिष्ट क्षमता हुन्छन् त्यसैले परीक्षामा राम्रो गर्दैमा सबै राम्रो हुन्छ र नगर्दैमा जीवन खत्तम हुन्छ भन्ने भ्रमबाट आफू र बालबालिकालाई मुक्त राख्नुपर्ने विशेषज्ञहरुको भनाई छ।

दिउसो परीक्षा हलमा चिट भेटिएपछि उतैबाट सम्पर्कविहीन बनेकी सीमा बुधबार बिहान झुण्डिएको अवस्थामा भेटिएकी हुन्। प्रहरीले पोष्टमार्टम पछि शव आफन्तको जिम्मा लगाएको छ।